एजेन्सी – प्रशिक्षणको अनुभव बटुल्न नपाउँदै युभेन्ट्सले आफ्ना पूर्व स्टार आन्द्रे पिर्लोलाई नयाँ मुख्य प्रशिक्षकका रुपमा नियुक्त गरेको छ ।

च्याम्पियन्स लिगको प्रि क्वार्टरफाइनलबाटै बाहिरिएपछि युभेन्ट्सले माउरिजियो सार्रीलाई बर्खास्त गरेको थियो । त्यसको केहि घन्टामा युभेन्ट्सले पिर्लोलाई नयाँ प्रशिक्षकका रुपमा प्रस्तुत गरेको छ ।

गत महिना मात्र पिर्लो युभेन्ट्सको यू २३ को प्रशिक्षक नियुक्त भएका थिए । ४१ वर्षे पिर्लोले यसअघि कुनै पनि युवा वा सिनियर टोलीलाई प्रशिक्षण दिएका थिएनन् ।

इटालियन च्याम्पियन युभेन्टसले यूईएफए च्याम्पियन्स लिगबाट बाहिरिएको २४ घण्टा नबित्दै सार्रीलाई बर्खास्त गरेको थियो । युभेन्टस च्याम्पियन्स लिगको राउन्ड अफ १६ मा लियोनसँग २-२ को बराबरी खेलेपछि अवे गोलको आधारमा प्रतियोगिताबाट बाहिरिएको थियो ।

पहिलो लेगमा १-० को हार बेहोरेको युभेन्टसले घरेलु मैदानमा शुक्रबार २-१ को जित दर्ता गरेपनि अगाडि बढ्न सकेन । युभेन्टसको जितमा दुवै गोल क्रिस्टियानो रोनाल्डोले गरेका थिए । सिजनको सुरुवातमा चेल्सी छोडेर युभेन्टस आएका सार्रीले च्याम्पियन्स लिगमा खराब प्रदर्शन गर्नु नै बर्खास्तीको मुख्य कारण रहेको बताइएको छ ।

सार्रीको नेतृत्वमा युभेन्टस इटालियन सुपर कप र कोप्पा इटालिया दुवै प्रतियोगिताको फाइनलमा पराजित भएको थियो । अर्जेन्टिनी प्रशिक्षक माउरिसियो पोचेटिनोलाई विकल्पका रुपमा हरेको बताइएपनि टोलीले आफ्ना पूर्व मिडफिल्डरमा विश्वास देखाएको छ ।

इटालीमा लिग उपाधि जितेपनि युभेन्टसले लिगका अन्तिम खेलतिर भने लय गुमाएको थियो । कोरोना संक्रमणपछि लिग सुरुवात हुँदा सुरुवाती खेलमा राम्रो प्रदर्शन गरेको युभेन्टसलाई उपाधि होडमा रहेका अन्य क्लबको खराब प्रदर्शनले निकै सहयोग पुग्यो ।

तर लिगको अन्तिमतिर भने युभेन्टसले पनि आफ्नो लय गुमायो । अन्य टोलीले पनि युभेन्टसको गल्तिको फाइदा उठाउन नसक्दा लिग उपाधि टुरिनमै रहन पुगेको थियो ।