एजेन्सी – युइएफए युरोपा लिगमा आज (सोमबार) राति क्वाटरफाइनलका दुई खेलमा प्रतिस्पर्धा हुँदैछ । इंग्लिस क्लब म्यानचेस्टर युनाइटेड र डेनिस क्लब कोपनहेगन तथा इटालियन क्लब इन्टर मिलान र जर्मन क्लब बायर लेभरकुसनबीच प्रतिस्पर्धा हुँदैछ ।

दुवै खेल जर्मनीमा नेपाली समयअनुसार राति १२ः४५ बजे हुनेछ । बाँकी दुई खेल साख्तर डोनेक्स र बसेल तथा वल्भ्स र सेभिल्लाबीचको खेल भोलि राति जर्मनीमै हुनेछ ।

यि दुई टोली कुनैपनि प्रतियोगितामा पहिलोपटक प्रतिस्पर्धा गर्न लागेको हो । दुवै टोली खेल जित्दै सेमिफाइनल पुग्ने लक्ष्यमा हुनेछ । युनाइटेडले अष्ट्रियन क्लब लास्कलाई समग्रमा ७–१ ले तथा कोपनहेगनले टर्किस क्लब इस्तानबुल बसाकसेहिरलाई समग्रमा ३–१ ले पराजित गर्दै क्वाटरफाइनलमा स्थान बनाएको थियो ।

पछिल्लो समय उच्च प्रदर्शन गरेको युनाइटेड सोही लयलाई निरन्तरता दिने दाउमा हुनेछ । युनाइटेडका लागि ब्रुनो फर्नान्डेज, एन्थोनी मार्सियल, मेसन ग्रीनवुड, मार्कुस रासफोर्ड, पल पोग्बा, नेमान्जा माटिच र ह्यारी मगाएरजस्ता खेलाडीको साथ हुनेछ ।
युनाइटेडले पछिल्लो पाँच खेलमा तीन जित र समान एक बराबरी र हारको नतिजा निकालेको छ । युनाइटेड पछिल्लो खेलमा चेल्सीसँग एफए कपमा चेल्सीसँग ३–१ ले पराजित भएको थियो ।

यता, कोपेनहेगन पनि युनाइटेडलाई स्तब्ध पार्दै सेमिफाइनल पुग्ने दाउमा हुनेछ । जोनस विन्ड टोलीका लागि मुख्य हतियार हुनेछ । जिका, भिक्टर नेल्सन, मोहमेद डारामीले विन्डलाई साथ दिनेछन् । कोपनहेगनले पछि पाँच खेलमा तीन जित र समान एक बराबरी र हारको नतिजा निकालेको छ । त्यसैले यि दुई टोलीबीचको खेल रोमाञ्चक हुने अनुमान गरिएको छ ।