एजेन्सी – यूईएफए च्याम्पियन्स लिग अन्तर्गत क्वाटरफाइनल चरणमा क्याटलान क्लब बार्सिलोनाले जर्मन च्याम्पियन बायर्न म्युनिखको सामना गर्दैछ । शुक्रबार हुने खेलमा बायर्नबाट ब्राजिलियन मिडफिल्डर कोउटिन्हो आफ्नै क्लब बार्सिलोनाविरुद्ध खेल्नेछन् ।

कोउटिन्हो सिजनको सुरुवातमा बार्सिलोनाबाट लोनमा बायर्न पुगेका थिए । बायर्नले १ सय २० मिलियन युरो खर्चेर उनलाई स्थायी रुपमा अनुबन्धन गर्ने विकल्प प्रयोग नगरेपछि उनी सिजनको अन्त्यपछि बार्सिलोना फर्कनेछन् । बार्सिलोनाले उनलाई सन् २०१८ मा १ सय ६० मिलियन युरो खर्चेर अनुबन्ध गरेको थियो ।

बार्सिलोनामा जम्न नसकेपछि उनलाई बायर्नले लोनमा अनुबन्ध गरेको थियो । बायर्नमा पनि उनको प्रदर्शन सुखद रहन सकेन । चोटका कारण सिजनको अन्त्यतिर मैदानबाहिर रहेका कोउटिन्होले पछिल्लो खेलमा चेल्सीविरुद्ध वैकल्पिक खेलाडीको रुपमा आधा घण्टा खेले । शुक्रबार बार्सिलोनाविरुद्ध पनि उनी खेल्ने सम्भावना रहेको छ ।

बार्सिलोनाले कोउटिन्होलाई लिएर हाल कुनै निर्णय लिएको छैन । उनी सिजनको अन्त्यमा क्याटलान क्लब फर्कने निश्चित छ । इंग्लिस क्लब आर्सनलले उनलाई लोनमा एक सिजन अनुबन्ध गर्न तयारी गरिरहेको बुझिएको छ । तर पेरिस सेन्ट जर्मेनले उनलाई स्थायी अनुबन्धनको विकल्पका रुपमा हेरिरहेको छ ।

सामान्यतया ला लिगामा लोनमा गएका खेलाडीले आफ्नो अभिभावक क्लबविरुद्ध खेल्न पाउँदैनन् । तर यूईएफएले भने त्यस्तो प्रावधान मान्दैन । त्यसैले पनि बार्सिलोनाविरुद्ध खेलमा बायर्नको जर्सीमा उत्रदै कोउटिन्होले आफ्नै क्लबलाई समस्या दिन सक्छन् ।