एजेन्सी – जर्मन क्लब बायर्न म्युनिखका फरवार्ड थोमस मुलरले ६ वर्षअघि ब्राजिलमाथि निकालेको जितभन्दा गएराति बार्सिलोनामाथिको जित उत्कृष्ट रहेको बताएका छन् ।

शुक्रबार राति बायर्नले च्याम्पियन्स लिगको क्वाटरफाइनलमा बार्सिलोनामाथि ८–२ को सानदार जित निकाल्दै अन्तिम चारको यात्रा तय गरेको थियो । जसमा मुलरले दुई गोल गरेका थिए । २०१४ को ब्राजिल विश्वकपको सेमिफाइनलमा जर्मनीले घरेलु टोलीलाई ७–१ को लज्जास्पद हार चखाएको थियो । उक्त खेलमा मुलरले एक गोल गरेका थिए ।

बार्सिलोनाविरुद्धको खेलमा म्यान अफ दि म्याच जितेका मुलरले खेलपछि ब्राजिलसँगको खेलभन्दा यो खेलमा पाएको जित विशेष रहेको बताएका हुन् । ‘२०१४ मा ब्राजिलविरुद्धको खेलमा जस्तो नियन्त्रण कहिल्यै थिएन । यस्तो कहिलेकाँही हुन्छ । तर, यसको कुरा नगरौ । आजको कुरा गरौं । यो एक विशेष रात थियो । नतिजा र हामीले खेल्ने तरिका विशेष थियो,’ ३० वर्षे मुलरले भने ।

‘सबभन्दा राम्रो कुरा के भने सब्सिच्युटबाट आएका खेलाडीले पनि उही स्तरमा खेल्दै सबैको मन जिते । महत्वपुर्ण कुरा भनेको मैदानमा हामी के गर्न चहान्छौं । त्यो पुर्ण भयो,’ उनले थपे ।

यस्तै मुलरले बार्सिलोनाविरुद्ध फराकिलो जित पाएपनि अर्काे खेल शून्यबाटै सुरु हुने बताएका छन् । ‘यो जित उत्कृष्ट छ । तपाईले यो कस्तो महसुस हुन्छ कल्पना गर्न सक्नुहुन्छ । यो खेल हाम्रो लागि विशेष बन्यो । तर, हामी यो खेलबाट रिकभर हुनुपर्दछ,’ मुलरले भने, ‘यो ठुलो कथन हो । तर, अर्काे खेल शून्यबाटै शुरु हुन्छ । यो फराकिलो जितले केही फरक पार्देन । मलाई थाहा छ । अन्य टोलीले पनि हाम्रा खेल हेरेका छन् । फाइनल पुग्न हामीलाई अर्काे खेल जित्नुपर्नेछ ।’

मुलरसँगै बार्सिलोनाबाटै अघिल्लो सिजन लोनमा बायर्न पुगेको ब्राजिली फिलिपे कौटिन्होले दुई गोल गरेका थिए । यस्तै इभान पेरिसिच, सर्ज जिनाब्री, जोसुवा किम्मिच र रोबर्ट लेवान्डोस्कीले गोल गरेपछि बार्सिलोनाले च्याम्पियन्स लिगको इतिहासमा फराकिलो पराजय भोग्नुपरेको थियो । बार्सिलोनाले च्याम्पियन्स लिगको इतिहासमा पहिलोपटक पहिलो हाफमै ४ गोल खाएको थियो । दोस्रो हाफमा पनि उति नै गोल खाएको थियो ।

यो पनि पढ्नुहोस :

पीडादायी इतिहासले पिरोलिएको बार्सिलोना

बार्सिलोनाविरुद्ध बायर्नको ८ गोल!