एजेन्सी – जर्मन क्लब बोरुसिया डर्टमुन्डले प्रि-सिजनको मैत्रीपूर्ण खेलमा अष्ट्रियाको शीर्ष डिभिजन क्लब अष्ट्रिया विएनमाथि ११-२ को सानदार जित दर्ता गरेको छ ।

अष्ट्रियाको तिसी स्त्राहोभमा भएको खेलमा डर्टमुन्डले पहिलो हाफमा ४-१ को अग्रता लिएको थियो । दोस्रो हाफमा ७ गोल थप्दै १ गोल खाएपछि जर्मन टोलीले फराकिको जित हासिल गरेको हो । डर्टमुन्डले अघिल्लो मैत्रीपूर्ण खेलमाझैं यस खेलमा पनि दोस्रो हाफमा सबै ११ खेलाडी परिवर्तन गरेको थियो । पहिलो खेलमा डर्टमुन्ड ६-० ले विजयी रहेको थियो ।

आइतबारको खेलमा डर्टमुन्डका लागि १० फरक खेलाडीले गोल गरेका थिए । पहिलो गोल अमेरिकी मिडफिल्डर जिओभानि रेइनाले नवौं मिनेटमा गरेका थिए । रेइनाले नै २३ औं मिनेटमा डर्टमुन्डको अग्रता दोब्बर पारे ।

३३ औ मिनेटमा क्रिस्टोफ मोन्सेनले गोल गर्दै घरेलु टोलीलाई खेलमा फर्काउने प्रयास गरे । तर राफाएल गुरेरो र इम्यानुएल फेराइले अन्तिम पाँच मिनेटको अन्तरमा गोल गर्दै ४-१ को अग्रता दिलाए ।

दोस्रो हाफमा अष्ट्रियाले पनि डिफेन्डर मिकेल मादीबाहेक सबै खेलाडी परिवर्तन गर्यो । तर दोस्रो टोलीले डर्टमुन्डको आक्रमणलाई रोक्न सकेन । इंग्लिस विंगर जेडन सान्चोले ५२ औं मिनेटमा गोल गर्दै खेललाई ५-१ को स्थितिमा ल्याए । एलेक्जेन्डर जुकिचले लगत्तै अर्को मिनेटमा गोल फर्काउँदै आशा कायम राखे ।

मिडफिल्डर एमरे च्यानले ६५ औं मिनेटमा गोल गर्दै टोलीलाई पुन: ४ गोलले अगाडी राखे । त्यसपछि मारिअस वल्फले ७३ औं मिनेट, थोर्गन हाजार्डले ७६ औं मिनेट र जुड बेलिन्घमले ७८ औं मिनेटमा गोल गरे । टायलान डुमान र निको सुल्जले अन्तिम १० मिनेटमा दुई गोल थपेपछि डर्टमुन्डले ११-२ को फराकिलो जित पक्का गर्यो ।