च्याम्पियन लिभरपुलको पहिलो खेल लिड्ससँग

एजेन्सी – इंग्लिस प्रिमियर लिगको नयाँ सिजन २०२०–२१ को खेल तालिका सार्वजनिक भएको छ । प्रिमियर लिगको नयाँ सिजन १२ सेप्टेम्वरबाट शुरु भएर २३ मे २०२१ मा सकिनेछ ।

बिहीबर सार्वजनिक भएको खेल तालिका अनुसार च्याम्पियन लिभरपुलले घरेलु मैदानमा नव प्रवेशी लिड्स युनाइटेडलाई पहिलो प्रतिद्वन्द्वी पाएको छ । लिड्स च्याम्पियनसिपको च्याम्पियन बन्दै १६ वर्षपछि शीर्ष डिभिजनमा फर्किएको हो ।

नयाँ सिजनको खेल तालिका अनुसार पहिलो दिन विभिन्न ६ खेलमा प्रतिस्पर्धा हुनेछ । पहिलो दिन आर्सनलले फुलहमसँग खेल्नेछ । लेष्टर सिटी र वेस्ट ब्रुम, टोटेनहम र एभर्टन, साउथह्याम्पटन र क्रिस्टल प्यालेस तथा वेस्टह्याम र न्युकासल युनाइटेडबीच पहिलो दिन प्रतिस्पर्धा हुनेछ ।

दोस्रो दिन लन्डन क्लब चेल्सीले १४ सेप्टेम्बरमा ब्राइटनसँग तथा सेफिल्ड र वल्भ्सबीच प्रतिस्पधा हुनेछ । यो सिजन दोस्रो स्थानमा लिग सकाएको म्यानचेस्टर सिटीले एस्टन भिल्लासँग खेल्दै प्रिमियर लिगको शुरुवात गर्दा म्यानचेस्टर युनाइटेडले बर्नलीसँग पहिलो खेल स्थगित गरिएको छ ।