एजेन्सी – यूईएफए नेसन्स लिगमा आज (आइतबार) राति समूह चरणको दोस्रो राउन्डको विभिन्न १० खेलमा प्रतिस्पर्धा हुँदैछ । स्पेन जर्मनी, वेल्स र रसियाजस्ता टोलीले दोस्रो राउन्डमा आ–आफ्नो प्रतिद्धन्द्धीको सामना गर्दैछ ।

समूह ‘ए’ को ४ मा रहेको स्पेनले घरेलु मैदानमा युक्रेनको आतिथ्यता गर्दैछ । खेल नेपाली समयअनुसार राति १२ः३० बजे हुनेछ । पहिलो खेलमा बलियो जर्मनीसँग १–१ गोलको बराबरी खेलेको स्पेन घरेलु मैदानमा युक्रेनलाई पराजित गर्दै नेसन्स लिगमा पहिलो जितको खोजीमा हुनेछ ।

रोड्रिगो, फेरान टोरेस, जोस गाया र पाउ टोरेसजस्ता युवा खेलाडीले जर्मनीविरुद्ध उच्च प्रदर्शन गरेका थिए । अन्सु फातीले पनि जर्मनीविरुद्ध सब्सिच्युट खेलाडीको रुपमा मैदान प्रवेश गर्दै डेब्युमा प्रभाव जमाएका थिए । यस्तै स्पनसँग कप्तान सर्जियो रामोस, थियागो अलकान्तरा, सर्जियो बुस्क्वेटस्, ड्यानियल कार्भजल र गोलरक्षक डेभिड हे गेया छन् ।

यता, पहिलो खेलमा स्वीट्जरल्यान्डलाई २–१ ले हराएको युक्रेन समूहमा लगातार दोस्रो जितको खोजीमा हुनेछ । युक्रेनका लागि फरवार्ड ओलेक्सान्डर जिनचेन्को मुख्य हतियार हुनेछन् । उनलाई एन्ड्रि यार्माेलेन्को र रुस्लान मालिनोभ्स्कीले साथ दिनेछन् ।

यि दुई टोली पछिल्लो पटक २०१५ मा युरो छनोटमा प्रतिस्पर्धा गरेका थिए । जसमा दुवै खेलमा स्पेनले समान १–० को जित निकालेको थियो । स्पेन सोही जितलाई निरन्तरता दिने लक्ष्यमा रहँदा युक्रेन स्पेनसँगको हारको श्रृंखला तोड्ने दाँउमा हुनेछ ।

यही समूहमा आज राति नै स्वीट्जरल्यान्ड र जर्मनीबीच राति १२ः३० बजे प्रतिस्पर्धा हुदैछ । खेल बसेलमा हुनेछ । जर्मनी र स्वीट्जरल्यान्ड दुवै टोली पहिलो जितको खोजीमा हुनेछ । समूहमा युक्रेन ३ अंक जोडेर शीर्षस्थानमा रहँदा समान अंक रहेको जर्मनी र स्पेन दोस्रो र तेस्रो स्थानमा रहेका छन् । अंकविहीन स्वीट्जरल्यान्ड पुछारमा छ ।

अन्य खेल

बी–४ :वेल्सविरुद्ध बुल्गेरिया राति (६ः४५ बजे), आयरल्यान्डविरुद्ध फिनल्यान्ड (राति ९ः४५ बजे)

डी– १ : एन्डोराविरुद्ध फारोई आईल्यान्ड (६ः४५ बजे), माल्टाविरुद्ध लात्भिया (राति १२ः३० बजे)

बी–३ : हंगेरीविरुद्ध रसिया (राति ९ः४५ बजे), सर्वियाविरुद्ध टर्की (राति १२ः३० बजे)

सी –३ : स्लोभेनियाविरुद्ध माल्दोभा (राति ९ः४५ बजे), कोसोभोविरुद्ध ग्रीस (राति १२ः३० बजे)

ए–४ :: स्पेनविरुद्ध युक्रेन (राति १२ः३० बजे), स्वीट्जरल्यान्डविरुद्ध जर्मनी (राति १२ः३० बजे)