एजेन्सी – युईएफए नेसन्स लिगमा आज (आइतबार) राति समूह चरणको दोस्रो राउन्डको विभिन्न १० खेलमा प्रतिस्पर्धा हुदैछ । स्पेन जर्मनी, वेल्स र रसियालगायतका टोलीले समूहको दोस्रो राउन्डमा आ–आफ्नो प्रतिद्वन्द्वीसँग प्रतिस्पर्धा गर्दैछन् ।

समूह ‘ए’ को ४ मा रहेको स्वीट्जरल्यान्डले जर्मनीको आतिथ्यता गर्दैछ । खेल नेपाली समयअनुसार राति १२ः३० बजेपछि हुनेछ । दुवै टोली पहिलो जितको खोजीमा हुनेछ । स्वीट्जरल्यान्ड पहिलो खेलमा युक्रेनसँग २–१ ले पराजित हुदा जर्मनी स्पेनसँग १–१ गोलको बराबरीमा रोकिएको थियो ।

जर्मनीका लागि टिमो वेर्नर मुख्य हतियार हुनेछ । वेर्नरले स्पेनविरुद्धको खेलमा पनि गोल गरेका थिए । उनलाई लिरोय साने, जुलियन ड्राक्सलर, रोविन गोसेन्सले साथ दिनेछन् । कप्तान टोनी क्रुस, इकेए गुन्डोगान, इम्री क्यान र एन्टेनियो रुडिगर हुनेछन् ।

यता, स्वीट्जरल्यान्ड पनि घरेलु मैदानमा जर्मनीलाई पराजित गर्ने लक्ष्यमा हुनेछ । युक्रेनलाई दवावमा राखेपनि रक्षापङ्ति कमजोर बन्दा स्वीट्जरल्यान्ड पराजत हुन पुगेको थियो । हरिस सेफेरोभिक, कप्तान ग्रानिट झाका र स्टेभन जुवेरको साथ स्वीट्जरल्यान्डलाई रहेको छ ।

यि दुई टोली २०१२ पछि पहिलोपटक आमने समाने हुन लागेका हुन् । २०१२ मा भएको मैत्रीपुर्ण खेलमा स्वीट्जरल्यान्डले ५–३ को जित निकालेको थियो । समूहमा युक्रेन ३ अंक जोडेर शीर्षस्थानमा रहँदा समान अंक रहेको जर्मनी र स्पेन दोस्रो र तेस्रो स्थानमा रहेका छन् । अंकविहीन स्वीट्जरल्यान्ड पुछारमा छ ।