एजेन्सी – फिलिप्पे काउटिन्हो नयाँ सिजन बार्सिलोनामै रहने लगभग पक्का देखिएको छ । प्रशिक्षक रोनाल्डो कोम्यानले ब्राजिलियन मिडफिल्डर क्लबमै रहने संकेत दिएका छन् ।

केहि दिन अघिसम्म उनले काउटिन्होलाई पनि विक्री गर्ने खेलाडीको सुचीमा राखेका थिए । तर प्रशिक्षणमा उनले देखाएको प्रदर्शन र टोलीको अवस्थाले पनि कोम्यानले उनलाई योजनामा सामेल गरेको बुझिएको छ । नयाँ सिजनमा उनी पुन: लोनमा जाने सम्भावनालाई पनि बार्सिलोनाले अस्वीकार गरेको छ ।

यदि कुनै पनि क्लबले ठूलो धनराशीमा स्थायी रुपमा काउटिन्होलाई भित्राउने प्रस्ताव राखेको अवस्थामा मात्र बार्सिलोना तयार हुने सम्भावना छ । कोराना भाइरस कोभिड १९ का कारण उत्पन्न कठिन आर्थिक कठिनाईका कारण उनको सरुवा सम्भव देखिन्न ।

बार्यन म्युनिखले १ सय २० मिलियन युरोमा काउटिन्होलाई किन्न सक्ने विकल्पलाई अस्वीकार गरेको थियो । त्यहि कारण एक सिजन बार्यनबाट लोनमा खेलेको २८ वर्षे काउटिन्हो बार्सिलोना फर्केका हुन् ।

कोम्यान बार्सिलोनालाई पुनर्निर्माण गर्ने योजनामा छन् । काउटिन्होलाई अब सेन्टर मिडफिल्डरमा खेलाउने सम्भावना रहेको छ । इर्नेस्टो भालभेर्डेले लिभरपुलका पूर्व खेलाडीलाई विङ्समा प्रयोग गर्दा त्यहाँ उनले प्रभावशाली प्रदर्शन गर्न सकेका थिएनन् ।