एजेन्सी – युईएफए नेसन्स लिगमा लगतार दोस्रो जित निकाल्ने क्रममा रसियाले हंगेरीलाई पराजित गरेको छ । रसियाले घरेलु टोली हंगेरीमाथि ३–२ को प्रतिस्पर्धात्मक जित निकालेको हो ।

रसियाको जितमा एन्टन मिरानचुक, मागोमेड ओजडोइभ र मारियो फर्नान्डेसले गोल गरे । घरेलु टोलीका रोलान्ड सल्लाई र नेमान्जा निकोलिकले गोल गरेपनि हार टार्न सकेनन् । पुस्कास एरिना बुडापेस्टमा आइतबार राति भएको खेलमा बल पोजेसनमा बलियो पकड बनाएपनि पाहुना टोली रसियाले खेलेको १५औं मिनेटमा अग्रता बनाएको थियो ।

डालेर कुजेभको पासमा एन्टनले गोल गर्दै घरेलु टोलीलाई १–० को अग्रता दिलाएका थिए । ३४औं मिनेटमा एन्डरे सेमेनोभको पासमा मागोमेडले गोल गरेपछि रसियाले पहिलो हाफमा २–० को अग्रता बनाएको थियो ।

दोस्रो हाफको शुरुमै कप्तान अर्टिम ज्युभाको पासमा मारियो फर्नान्डेसले गोल गरेपछि रसिया सहज जिततर्फ अग्रसर बनेको थियो । खेलमा ३–० ले पछि परेपछि आक्रमब बनेको हंगेरीले त्यसपछि आठ मिनेटको अन्तरमा दुई गोल गर्दै खेलमा फर्कने संकेत देखाएको थियो ।

६२औं मिनेटमा रोलान्ड सल्लाईले सल्ट कलमारको पासमा गोल गर्दै खेललाई ३–१ को अवस्थामा ल्याए । ७०औं मिनेटमा वर्नावास बेसेको पासमा नेमान्जा निकोलिकले गोल गर्दै हंगेरीलाई ३–२ को अवस्थामा ल्याएका थिए । तर त्यसपछि थप गोल निस्कन नसक्दा रसियाले आफ्नो पक्षमा पार्न सफल भयो ।

नेसन्स लिगमा लगातार दोस्रो जित दर्ता गरेको रसिया लिग ‘बी’ को ३ मा ६ अंक जोडेर शीर्षस्थानमा रहेको छ । पराजित हंगेरी ३ अंक जोडेर दोस्रो स्थानमा रहेको छ । समान एक अंक जोडेको टर्की र सर्विया तेस्रो र पुछारमा छ । यही समूहको अर्काे खेलमा सर्विया र टर्कीले गोलरहित बराबरी खेल्दै अंक बाँडेका थिए ।

अन्य नतिजा

बी–४ : वेल्सविरुद्ध बुल्गेरिया राति (१–०), आयरल्यान्डविरुद्ध फिनल्यान्ड (०–१)

डी– १: एन्डोराविरुद्ध फारोई आईल्यान्ड (०–१), माल्टाविरुद्ध लात्भिया (१–१)

बी–३: हंगेरीविरुद्ध रसिया (२–३), सर्वियाविरुद्ध टर्की (०–०)

सी –३: स्लोभेनियाविरुद्ध माल्दोभा (१–०), कोसोभोविरुद्ध ग्रीस (१–२)

ए–४: स्पेनविरुद्ध युक्रेन (४–०), स्वीट्जरल्यान्डविरुद्ध जर्मनी (१–१)