एजेन्सी – स्पेनका युवा प्रतिभा अन्सु फाती सबैभन्दा कम उमेरमा स्पेनको सिनियर राष्ट्रिय टिमबाट गोल गर्ने खेलाडी नयाँ कीर्तिमान कायम गरेका छन् ।

यूईएफए नेसन्स लिगमा आइतबार राति युक्रेनविरुद्ध एक गोल गर्दै फातीले ९५ बर्षको पुरानो कीर्तिमान तोडेका हुन् । उनले १७ बर्ष ३ सय ११ दिनको कम उमेरमा स्पेनका लागि सिनियर राष्ट्रिय टिमबाट गोल गर्न सफल भएका हुन् ।

फातीले युक्रेनविरुद्ध व्यक्तिगत पहिलो तथा टोलीका लागि तेस्रो गोल गरेका थिए । उनैले नै पेनाल्टी जित्दा स्पेनले खेलमा सुरुवाती अग्रता बनाएको थियो । यसअघि जुआन एराजुकिनले सन् १९२५ मा १८ बर्ष ३ सय ४४ दिनको उमेरमा स्विटरल्याण्डविरुद्धको खेलमा गोल गर्दै सबैभन्दा कम उमेरमा गोल गर्दै यो कीर्तिमान बनाएका थिए ।

गिनी बिसाउमा जन्मिएका फाती ५ बर्षको उमेरमा परिवारसहित स्पेन आएका हुन् । उनले क्याटलान क्लब बार्सिलोनाको ला मासियामा आफ्नो प्रतिभा निखार्दै अघिल्लो सिजनबाट नै बार्सिलोनाको पहिलो रोजाईमा स्थान बनाउन सफल भएका थिए । क्याटलान क्लब बार्सिलोनाका फाती युइएफए च्याम्पियन्स लिगको इतिहास र स्पेनिस लिगमा समेत सबैभन्दा कम उमेरमा गोल गर्ने खेलाडी हुन् ।

नेसन्स लिगमार्फत नै सिनियर टोलीमा स्थान बनाएका फातीले गत बिहीबार जर्मनीसँग १–१ गोलको बराबरी भएको खेलमा दोस्रो हाफका लागि जेसस नाभासको स्थानमा मैदान प्रवेश गर्दै ‘डेब्यु’ गरेका थिए । खेलमा स्पेन ४–० ले विजयी हुन सफल हुदा कप्तान सर्जियो रामोसले दुई तथा फातीसँगै फेरान टोरेसले गोल गरेका थिए । ३४ वर्षे भेट्रान सेन्टर ब्याक रामोसले पछिल्ला १५ खेलमा स्पेनका लागि १० अन्तर्राष्ट्रिय गोल गर्दा देशका लागि २३ गोल पुरा गरेका छन् ।