एजेन्सी – इंग्लिस राष्ट्रिय फुटबल टोलीका फरवार्ड ट्यामी अब्राहमको जन्मदिनको पार्टी राष्ट्रिय टोलीका खेलाडीलाई महँगो पर्ने भएको छ ।

फरवार्ड अब्राहमको जन्मदिनको अवसरमा भएको पार्टीमा सहभागी हुँदा अब्राहमसँगै जेडन सान्चो र बेन चिलवेलले वेल्सविरुद्धको खेल गुमाउने भएका छन् । कोभिड – १९ को नियम तोडेका कारण प्रशिक्षक ग्यारेथ साउथगेटले यि तीन खेलाडीलाई टोली बाहिर राखेका हुन् ।

सोमबार राति सेन्ट जर्ज पार्कमा भएको टिम मिटिङमा प्रशिक्षक साउथगेटले खेलाडीहरुलाई महत्त्वपुर्ण अन्तर्राष्ट्रिय खेलअघि आफ्नो जिम्मेवारीबारे सम्झाउँदै मैदानबाहिरको अवस्थाबारे औंल्याएका थिए । साउथगेटले अब्राहम, सान्चो र चिलवेल वेल्सविरुद्धको खेलमा टोलीमा नरहने बताएका छन् । यी खेलाडीलाई नगद जरिवाना हुने सम्भावना समेत रहेको छ ।

यी तीन खेलाडीसहित अन्य टोलीमा नपरेका खेलाडीले शनिबार राति इंग्लयान्ड सरकारको नियम विपरित ट्याम्मी अब्राहमको २३औं जन्मदिन मनाएका थिए । इंग्ल्यान्डमा हाल ६ जनाभन्दा बढी मानिस एकै ठाउँमा रहेर कार्यक्रम गर्न प्रतिबन्ध लगाइएको छ । तर अब्राहमको जन्मदिनमा यी खेलाडीसहित अन्य व्यक्तिहरु समेत रहेको भिडियो बाहिरिएको थियो ।

इंग्ल्यान्ड एफएले हाललाई तीन खेलाडी वेल्ससँगको खेलका लागि अनुपस्थित रहने पक्का गरेको छ । बाँकी नेसन्स लिगका खेलबारे भने केहि दिनमा निर्णय हुनेछ । इंग्ल्यान्डले यसअघि रहिम स्टर्लिङ चोटका कारण उपस्थित नहुने भएपछि चेल्सीका रिस जेम्सलाई टोलीमा समेटेको थियो ।

इंग्ल्यान्डले बिहीबार राति वेल्ससँग प्रतिस्पर्धा गर्दैछ । त्यसपछि इंग्ल्यान्डले नेसन्स लिगमा बेल्जियम र डेनमार्कसँग प्रतिस्पर्धा गर्दैछ ।

अघिल्लो महिना मात्र इंग्ल्यान्डको राष्ट्रिय टोलीबाट यसै साता डेब्यु गरेका मिडफिल्डरद्वय फिल फोडेन र मेसन ग्रिनवुड बाहिरका महिलालाई टिम होटेलमा ल्याएपछि कारवाहीमा परेका थिए ।