एजेन्सी – युरोपियन फुटबलमा अन्तर्राष्ट्रिय विश्राम सुरु भएको छ । बार्सिलोनाका एन्टोइन ग्रिजमन पनि अन्तर्राष्ट्रिय जिम्मेवारीका क्रममा विश्वविजेता फ्रान्सको राष्ट्रिय टोलीमा  छन् ।

यस्तोमा फ्रान्सेली टोलीका प्रशिक्षक डिडिएर डेसच्याम्पसले एट्लेटिको म्याड्रिडका पूर्व फरवार्ड ग्रिजमन बार्सिलोनामा खुसी नरहेको बताएका छन् । काटलान क्लबमा पहिलो सिजनमा ग्रिजमनले प्रभाव जमाउन सकेनन् । नयाँ सिजनका तीन खेलमा पनि बार्सिलोनामा उनी खासै जम्न सकेका छैनन्, जसरी उनले एट्लेटिकोमा आफुलाई प्रस्तुत गर्थे ।

‘बार्सिलोनको अहिलेको अवस्थामा उनी खुसी छैनन् भन्नेमा म प्रष्ट छु । यदि उनले सार्वजनिक रुपमा त्यो भने भने रोनाल्ड कोम्यानलाई सुन्न राम्रो नलाग्ला,’ डेसच्याम्पसले भने,’ बार्सिलोनमा के भइरहेको छ त्यसमा म टिप्पणी गर्न चाहन्न । तर ग्रिजमनलाई किन राइट विङ्स्मा खेलाइएको छ मैले बुझेको छैन । किन उनलाई सेन्टरमा खेलाइएको छैन ?’

डेसच्याम्पसले भने लामो समयदेखि ग्रिजमनलाई सेकेन्ड फरवार्डका रुपमा प्रयोग गर्दै आइरहेका छन् । ओलिभर जिर्रोड वा केलियन एमबाप्पेको पछाडि बसेर ग्रिजमनले टोलीलाई सघाइरहेका हुन्छन् । खेलाडीको विकल्प धेरै हुँदा पनि डेसच्याम्पसले ग्रिजमनलाई सेन्टरमा खेलाउँछन् ।

पहिलो रोजाइमा रहेर पनि ग्रिजमनले यो सिजन सामान्य प्रदर्शन गरेका थिए । २ वटा मौका पाउनका वावजुद ग्रिजमनले गोल गर्न नसकेको खेलमा बार्सिलोनाले सेभिल्लासँग १–१ को बराबरी खेलेको थियो । बार्सिलोनाका प्रशिक्षक कोम्यानले पनि ग्रिजमन जस्तो स्तरीय खेलाडीले त्यस्तो २ मौकामा कम्तिमा १ गोल गर्नेपर्ने बताएका थिए ।