एजेन्सी – रियल म्याड्रिडका फरवार्ड करिम बेन्जेमाले पछिल्लो ५ फ्रान्सेली राष्ट्रिय फुटबल टोलीको जर्सी लगाउने मौका पाएका छैनन् ।

भर्खरै सम्पन्न अन्तर्राष्ट्रिय खेलहरुको पृष्ठभूमीमा बेन्जेमाले सामाजिक सञ्जालमार्फत रहस्यमय सन्देश दिएका छन् । माथिउ भाल्बुएना र बेन्जेमा सहभागी विषय अदालतमा पुगेदेखि बेन्जेमा फ्रान्सेली टोलीबाट बाहिर छन् । बेन्जेमाले त्यसबेला राष्ट्रिय टोलीमा रहेका भाल्बुएनाको अश्लिल भिडियो सार्वजनिक गरेको आरोप लागेको थियो । उनले विश्वकपमा समेत खेल्न पाएका थिएनन् ।

फ्रान्सेली फुटबल महासंघ (एफएफएफ) ले उनलाई किन टोलीमा सामेश गरिदैन भन्ने हालसम्म प्रष्ट पारेको छैन । यद्दपी रियलको हरेक सफलतामा बेन्जेमाको भूमिका महत्त्वपूर्ण रहँदै आएको छ ।
बेन्जेमाको विषयमा जनतामा पनि अलग अलग विचार रहने गरेको छ ।

कतिपय बेन्जेमाको समर्थनमा देखिन्छन् । कतिले भने एफएफएफ र त्यसका अध्यक्ष नोल ल ग्रेटले लिएको निर्णयलाई सहि मानेका छन् । सन् २००७ देखि फ्रान्सेली टोलीबाट खेल्दा बेन्जेमाले ८१ खेलमा २७ गोल गरेका थिए ।

अन्तर्राष्ट्रिय फुटबलका लागि फ्रान्सेली प्रशिक्षक डिडिएर डेसच्याम्पसले टोलीको घोषणा गर्दा बेन्जेमा सामेल रहेका छैनन् । टोली घोषणापछि बेन्जेमाले ट्विट गरेका थिए, ‘जब अरुले घृणा गर्छन्, म मुस्कुराउँछु मात्रै ।’