एजेन्सी – डेब्यु खेलमै इरिक म्याक्सिम चुपो मोटिङले दुई गोल र अर्काे गोलमा पनि सहभागी भएपछि बायर्न म्युनिखले डिएफबी पोकलको पहिलो राउन्डमा सहज जित हात पारेको छ ।

एलिएन्ज एरिनामा बिहीबार राति भएको खेलमा डिफेन्डिङ च्याम्पियनसमेत रहेको बायर्नले पाँचौ श्रेणीको डुरेनमाथि ३–० को सानदार जित हात पारेको हो । अर्काे एक गोल थोमस मुलरले गरेका थिए ।

३१ वर्षीय क्यामरुनी फरवार्ड यसै समरमा फ्रान्सेली च्याम्पियन पेरिस सेन्ट जर्मेन (पीएसजी) बाट बायर्न फ्रि एजेन्टमार्फत आएका थिए ।

अन्तर्राष्ट्रिय विश्रामका कारण बायर्नका प्रशिक्षक हान्सी फ्लिकले टोलीमा ब्यापक परिवर्तन गरेर खेलाउनु परेको थियो । तर पाँचौ श्रेणीको टोलीविरुद्ध बायर्नको दोस्रो रोजाईका टोलीले जित निकाल्न खासै संघर्ष गर्नुपरेन ।

खेलको दोस्रो मिनेटमा नै डुरेनले गोलको सुन्दर अवसर खेर फालेको थियो । पाँचौ मिनेटमा बायर्नका डगलस कोस्टाको फ्रिकिकमा जेभियर मार्टिनेजको हेडर पोस्टबाट थोरै बाहिरिएको थियो । १८औं मिनेटमा मोटिङले गोलको सुवर्ण अवसर खेर पाल्दा बायर्न अग्रता लिनबाट चुकेको थियो ।

२४औं मिनेटमा बोउन सारको पासमा मोटिङले गोल गर्दै बायर्नलाई अग्रता दिलाए । ३३औं मिनेटमा बेकरको भली प्रहार क्रसबारमा लागेर बाहिरिदा डुरेन बराबरीबाट चुकेको थियो । ३६औं मिनेटमा थोमस मुलरले पेनाल्टीमार्फत गोल गर्दै बायर्नको अग्रता दोब्बर बनायो ।

पेनाल्टी बक्समा मोटिङलाई सोविचले फल गरेपछि रेफ्रीले बायर्नलाई पेनाल्टी दिएको थियो । पहिलो हाफको इन्ज्युरी समयमा डगलस कोस्टाको प्रहारलाई डुरेनका गोलरक्षक ज्याकमुथले उत्कृष्ट बचाउ गरे ।

६३औं मिनेटमा मोटिङको प्रहारमा गोलरक्षक नै बाधक बने । ७५औं मिनेटमा मोटिङले व्यक्तिगत दोस्रो तथा टोलीका लागि तेस्रो गोल गरेपछि बायर्न खेलमा ३–० ले अघि बढ्यो ।

८६औं मिनेटमा मार्टिनेजको प्रहार पोस्टमा लागेर फर्कियो । पाँचौ श्रेणीको क्लबविरुद्ध ७२ प्रशिशत बल पोजेसन राखेको बायर्नले बारम्बार डुरेनको पोस्टमा धावा बोल्दा गोलरक्षक ज्याकमुथ निकै व्यस्त बनेका थिए ।

डुरेनविरुद्ध बायर्नले थोमस मुलर, मोटिङ, डगलस कोस्टा, जमल मुसिएला, मार्क रोका, जेभियर मार्टिनेज, अलफन्सो डाभिस, जेरोमी बोएटिङ, निकलस सुल, बोउन सार र गोलरक्षक एलेक्सान्डर नुवेललाई उतारेको थियो । अन्तर्राष्ट्रिय ब्रेकपछि शीर्ष खेलाडीहरु क्लब फर्कने क्रममा रहेको छ ।