एजेन्सी – अन्तर्राष्ट्रिय विश्रामपछि फ्रान्सेली च्याम्पियन पेरिस सेन्ट जर्मेन (पीएसजी) ले फ्रेन्च लिग वानको सातौं चरणमा निम्सको सामना गर्दैछ । खेल नेपाली समयअनुसार राति १२ः४५ बजे निम्समा हुनेछ ।

घरेलु टोली निम्सलाई पराजित गर्दै पीएसजीमा कम्तीमा पनि एक दिनको लागि शीर्षस्थानमा उक्लने योजनामा हुनेछ । निम्सविरुद्ध जित निकाल्न सके चौथो स्थानमा रहेको पीएसजीले रेनेस, लिल र लेन्सलाई पछि पार्नेछ । रेनेस र लिलको १४ अंक रहँदा लेन्सको १३ अंक छ । पीएसजीको १२ अंक छ ।

शुरुवाती दुई खेल गुमाएर त्यसपछि लगातार चारै खेलमा सफलता हात पारेको पीएसजी सोही जितको लयलाई निरन्तरता दिने दाउमा हुनेछ । तर, अन्तर्राष्ट्रिय विश्राममा रहेका स्टार फरवार्ड ब्राजिली नेयमार टोलीमा हुने छैनन् । प्रतिबन्ध र चोटका कारण कप्तान मार्किन्हस टोलीमा हुनेछैन । लेभिन कुर्जावा र एन्जल डि मारिया प्रतिबन्धका कारण टोलीमा हुनेछैन ।

यस्तो अवस्थामा पीएसजीको अग्रपङ्ति पाब्लो साराविया, मोउरो इकार्डी, मार्काे भेराट्टी, राफिन्हा, इड्रिसा गाना गुया, मिचेल बाक्केर, प्रेसनेल किम्पेम्वे, एब्डु डियालो, कोलिन डग्वा, किलियन एमबाप्पे र गोलरक्षक केलर नाभास हुनेछन् ।

यता, निम्स पनि पीएसजीलाई स्तब्ध पार्दै अंक तालिका सुधार गर्ने दाँउमा हुनेछ । निम्स ८ अंकसहित १३औं स्थानमा छ । निम्स पीएसजीको स्टार खेलाडी नभएको फाइदा उठाउने योजनामा हुनेछ । यि दुई टोली तीन पटक प्रतिस्पर्धा गर्दा तीनैपटक पीएसजी विजयी भएको छ ।