एजेन्सी – एक साताको अन्तर्राष्ट्रिय ब्रेकपछि क्लब फुटबल सुरु हुँदा प्रिमियर लिगअन्तर्गत गुडिसन पार्कमा मर्सिसाइड डर्वीमा एभर्टन र लिभरपुलबीच प्रतिस्पर्धा हुँदैछ । खेल नेपाली समयानुसार साँझ ५ः१५ बजे हुनेछ ।

लयमा रहेको एभर्टन साविकको विजेता लिभरपुललाई पराजित गर्दै अंक तालिकामा थप पकड बनाउने लक्ष्यमा हुनेछ । यसै समरमा स्पेनिस क्लब रियल म्याड्रिडबाट एभर्टन पुगेका हामेस रोड्रिग्वेज र इंग्लिस डोमिनिक काल्भर्ट लेविन नै टोलीको हतियार हुनेछन् । रोड्रिग्वेजले यो सिजनको चार खेलमा ३ गोल गर्नुका साथै दुई असिस्ट पनि दिएका छन् । काल्भर्टले यो सिजन ४ खेलमा ६ गोल गरिसकेका छन् ।

यस्तै रिचार्लीसन, आन्द्रे गोमेज, एलान, यारी मिना, लुकास डिग्ने, माइकल किन, गिल्फी सिगुर्डसन, सिमस कोलेमन, एलेक्स इओवी र गोलरक्षक जोर्डन पिकफोर्ड एभर्टनसँग हुनेछ । प्रशिक्षक कार्लो एन्सेलोटि उत्कृष्ट सुरुवात दिएपनि यो खेल लिगको अंक तालिकासँगै सहरी प्रतिष्ठासँग पनि जोडिएको कारण केहि दबाबमा हुनेछन् ।

यता, कोरोना संक्रमणमुक्त भएर फर्किएका फरवार्ड साडियो माने र मिडफिल्डर थियागो अलकान्तराको आगमनले लिभरपुलको मनोबल बढेको छ । दुवै खेलाडीले एस्टन भिल्लासँग ७–२ को हारको खेल गुमाएका थिए । पहिलो रोजाईका गोलरक्षक एलिसन बेकर घाइते हुँदा उनको स्थानमा एड्रियनले नै मौका पाउने सम्भावना छ ।

लिभरपुल अघिल्लो खेलमा भिल्लासँग भोगको लज्जास्पद हारलाई एभर्टनविरुद्धको खेलबाट बिर्साउने प्रयासमा हुनेछ । लिभरपुलसँग मानेसँगै मोहम्मद सलाह, रोबर्टाे फिर्मिन्हो, डिएगो जोटा, जर्जिन्हो वाइनाल्डम, फविन्हो, भर्जिल भान डाइक, एन्ड्रिउ रोबर्टसन, ट्रेन्ट एलेक्सान्डर अर्नाेल्ड र जोसेप गोमेज छन् । कोरोना संक्रमणका कारण नावी केइटा टोलीमा हुनेछैन ।

यि दुई टोलीले हालसम्म २३ खेलमा प्रतिस्पर्धा गर्दा ११ खेलमा लिभरपुल विजयी भएको छ । एक खेल मात्रै एभर्टनले जितेको छ । ११ खेल बराबरीमा सकिएको छ । २०१० को प्रिमियर लिगमा २–० ले हराएयता एभर्टनले लिभरपुललाई पराजित गर्न सकेको छैन ।

विगतमा लिभरपुल र एभर्टनको खेलमा लिभरपुल दाबेदार टोलीको रुपमा रहने गर्थ्यो । तर यसपटक डर्बी खेलमा फरक रौनक छ । स्वयं प्रशिक्षक योर्गेन क्लोपले पनि यसलाई स्वीकारेका छन् । उनले कार्लोको आगमनपछि एभर्टन फरक टोलीको रुपमा उभिने आँकलन गरेका थिए, जुन अहिले नतिजामा पनि देखिएको छ ।

चार चरणको खेलपछि अपराजित रहेको एभर्टन १२ अंक जोडेर शीर्षस्थानमा रहँदा लिभरपुल ९ अंकसहित पाँचौ स्थानमा रहेको छ ।

अन्य खेल

चेल्सीविरुद्ध साउथह्याम्पटन (राति ७ः४५ बजे), म्यानचेस्टर सिटीविरुद्ध आर्सनल (राति १०ः१५ बजे), न्युक्यासलविरुद्ध म्यानचेस्टर युनाइटेड (राति १२ः४५ बजे)