एजेन्सी – रियल म्याड्रिड र बार्सिलोनाबीचको एल क्लासिको विभिन्न कारणले चर्चामा रहने गरेको छ । गोल गर्नेको चर्चा त स्वभाविक रुपमा हुन्छ नै । तर, बार्सिलोनाका कप्तान लोओनल मेस्सीले गोल गर्न नसक्दा पनि त्यत्तिकै चर्चा हुने गरेको छ ।

मेस्सी फेरि एक पटक रियल विरुद्ध गोल गर्न असफल भएका छन् । रियलविरुद्ध उनले पछिल्ला ७ खेलमा गोल गर्न सकेका छैनन् । अन्सु फातीले बार्सिलोनाका लागि एक मात्र गोल गरेको शनिबारको एल क्लासिकोमा रियल ३–१ ले विजयी भएको थियो ।

मेस्सीले पछिल्लो पटक रियलविरुद्ध सन् २०१७-१८ ला लिगा सिजनको ३६ औ म्याच डेमा २–२ को बराबरीमा गोल गरेका थिए । त्यसको अर्थ क्रिस्टियानो रोनाल्डोले रियल छाडेर युभेन्ट्स गएयता मेस्सीले रियलविरुद्ध गोल गर्न सकेका छैनन् ।

जारी सिजनमा मेस्सीले ला लिगामा १ गोल मात्र गरेका छन् । भिल्लारियलविरुद्ध सिजनको पहिलो खेलमा मेस्सीले गोल गरेका थिए । त्यसयताका लिग खेलमा उनले गोल मात्र गर्न नसकेका होइनन् एसिस्ट पनि गरेका छैनन् । मेस्सीको यस्तै खराब प्रदर्शन २०१४ मा पनि भएको थियो ।

गत सिजनको अन्त्यतिर नै क्लबसँगको मेस्सीको असमझदारी बढेको थियो । ला लिगा रियलले जित्नु र च्याम्पियन्स लिगको क्वार्टरफाइनलमा बायर्न म्युनिखसँग ८–२ को पराजय पछि क्लब र मेस्सीबीचको तिक्तता झनै बढेको थियो । त्यसका कारण ३३ वर्षे फरवार्डले बार्सिलोना छाड्न चाहेका थिए । तर, बार्सिलोना त्यसका लागि तयार नभएपछि सम्झौताको अन्त्यसम्म बस्नका लागि मेस्सी राजी भएका थिए ।

क्लब जिम्मेवारीमा भन्दा अर्जेन्टिनाको राष्ट्रिय टोलीबाट भने मेस्सीको प्रदर्शन सन्तोषजनक रहेको छ । यो सिजन अर्जेन्टिनाका लागि २ खेलमा उनले १ गोल गरेका थिए । यसै महिना विश्वकप छनोटमा उनले इक्वेडरविरुद्ध गोल गरेका थिए ।