एजेन्सी – यूईएफए च्याम्पियन्स लिग अन्तर्गत मंगलबार समूह ‘बी’ मा रियल म्याड्रिडले बोरुसिया मोन्चेनग्लाडबाकको सामना गर्दैछ । अघिल्लो खेलमा शाख्तरसँग पराजित रियल पहिलो जितको खोजीमा हुनेछ । खेल नेपाली समयानुसार रातको १:४५ बजे सुरु हुनेछ ।

घरेलु मैदानमा ३-२ को हार बेहोरेका कारण रियल समूहमा पुछारमा छ । अर्को खेलमा इन्टर मिलान र ग्लाडबाकले २-२ को बराबरी खेलेका थिए । रियलले उक्त हारपछि स्पेनिस ला लिगा अन्तर्गत शनिबार भएको एल क्लासिकोमा बार्सिलोनालाई पराजित गर्यो । ग्लाडबाकले भने जर्मन लिगमा माइन्जलाई ३-२ ले हराएको थियो ।

इन्टरविरुद्ध बलियो प्रदर्शन गरेको ग्लाडबाक सोहि प्रदर्शनलाई निरन्तरता दिने सुरमा हुनेछ । रोमेलु लुकाकुले अन्तिम समयमा गोल गरेपछि इन्टर हारबाट जोगिएको थियो । यता रियल भने च्याम्पियन्स लिगमा लगातार तेस्रो हारको सिलसिला टुंग्याउने योजनामा हुनेछ । गत सिजन पनि म्यानचेस्टर सिटी राउन्ड अफ १६ को दुवै लेगमा पराजित भएको थियो ।

ग्लाडबाकका लागि आन्द्रिएस पल्सेन, डेनिस जाकारिया र लास्लो बेनेस चोटका कारण उपस्थिति रहने छैनन् । मार्क्स ठुराम, एलेसन प्लेअ, जोनास होफम्यान र फ्लोरियन नुहसले लिग खेलमा विश्राम पाएपछि पहिलो रोजाईमा खेल्नेछन् । भ्यालेन्टिनो लाजारो र मामदु डुकुरे भने बेन्चमा रहने सम्भावना छ ।

रियलले ड्यानी कार्भाजल, मार्टिन ओडेगार्ड, मारियानो डियाज र अल्भारो ओड्रीओजोलालाई टोलीमा समेटेको छैन । नाचो पनि चोटका कारण टोलीमा छैनन् । लुकास भाज्केजले राइट ब्याकमा खेल्ने सम्भावना रहेको छ ।