एजेन्सी – इंग्लिस च्याम्पियन लिभरपुलले यूईएफए च्याम्पियन्स लिगको समूह ‘डी’ को खेलमा एफसी मिट्जील्यान्डलाई २-० ले पराजित गरेको छ । घरेलु मैदान एनफिल्डमा जित हासिल गर्दा लिभरपुलको चोटको चिन्ता भने थपिएको छ ।

लिभरपुलले झन्डै ५ वर्षपछि आफ्नो मुख्य तीनै फरवार्डमध्य कसैलाई टोलीमा उतारेको थिएन । साडियो माने, मोहमद सलाह र रोबर्टो फिर्मिनो तीनै जना बेन्चमा रहेको खेलको पहिलो हाफमा लिभरपुलले पोस्टमा प्रहार नै गर्न सकेन । दोस्रो हाफमा दुई गोल गरेपछि लिभरपुल जित हासिल गर्न सफल भयो ।

खेलको ३० औं मिनेटमा नै ब्राजिलियन मिडफिल्डर फाबिन्हो घाइते हुन पुगे । डिफेन्डर भर्जील भान डाइक सिजनभर खेल्न नसक्ने भएपछि डिफेन्समा खेल्दै आएका फाबिन्हो ह्यामस्ट्रीङमा चोट बोकेपछि मैदान छाड्न बाध्य भएका थिए । उनको स्थानमा रिस विलियम्सले डिफेन्समा खेलेका थिए ।

खेलको ५५ औं मिनेटमा डियोगो जोटाले लिभरपुललाई अग्रता दिलाए । उनले जेर्डान शाकिरीले बनाएको मुभपछि ट्रेन्ट एलेक्जेन्डर आर्नोल्डले दिएको पासमा सहजै गोल गरेका थिए । खेलको अन्त्यतिर भने क्लोपले आफ्ना मुख्य तीन फरवार्डलाई नै मैदान पठाएका थिए । त्यसको फल्स्वरूप लिभरपुलले अग्रता दोब्बर पार्ने अवसर पनि पायो ।

इन्ज्युरी समयमा सलाहलाई मिट्जील्यान्डका पाउलिन्होले लडाएपछि रेफ्रीले पेनाल्टी दिए । उक्त पेनाल्टीमा सलाहले गोल गर्दै लिभरपुलको जित सुनिश्चित गरे । यस जितसँगै लिभरपुलको २ खेलमा ६ अंक भएको छ ।

अर्को खेलमा आयक्स र एटलान्टाले २-२ को बराबरी खेले । एटलान्टाको ४ अंक छ भने आयाक्सको १ अंक रहेको छ । पहिलो खेलमा एटलान्टासँग ४-० ले पराजित मिट्जील्यान्ड अंकविहिन रहँदै पुछारमा छ ।

यो पनि : बायर्नको लगातार १३ औं जित