एजेन्सी – यूईएफए च्याम्पियन्स लिग अन्तर्गत बुधबार बार्सिलोनाले इटालियन च्याम्पियन युभेन्टसको मैदानमा २-० को जित दर्ता गर्यो । उक्त खेलमा युभेन्टसका फरवार्ड अल्भारो मोराटाले तीन पटक गोल गरेपनि सबै गोल भीएआरको सहायतामा अफसाइड देखिएपछि मान्य भएन ।

खेलको १४ औं मिनेटमा नै बार्सिलोनाले ओस्मान डेम्बेलेको गोलमा अग्रता लिएको थियो । कप्तान लिओनेल मेस्सीले दिएको लामो पासलाई नियन्त्रणमा लिँदै दुई डिफेन्डरको बीचबाट डेम्बेलेले गरेको प्राहार गोलरक्षक वोजचिएक सेचेज्नीले बचाउन सकेनन् ।

त्यसको एक मिनेटपछि नै मोराटाले युभेन्टसका लागि बराबरी गोल फर्काएका थिए । तर रेफ्रीले मोराटा अफसाइड रहेको भन्दै गोल दिएनन् । ३० औं मिनेटमा पनि मोराटाले जुआन क्वाडराडोकै क्रसलाई गोलमा परिणत गरेका थिए । यसपटक पनि उनी केहि इन्च अफसाइड देखिए ।

दोस्रो हाफको ५५ औं मिनेटमा पनि क्वाडराडोकै क्रसमा युभेन्टसका फरवार्ड अल्भारो मोराटाले दुई पटक गोल गरेपनि रेफ्रीले भिडियो असिस्टेन्ट रेफ्रीको सहायता लिँदै गोललाई मान्यता दिएनन् । मोराटाले खेलमा तीन पटक सटिक फिनिस गरेपनि भीएआरको निर्णयले उनलाई गोल गर्नबाट बन्चित गर्यो ।

६९ औं मिनेटमा अद्रिएन राबीओटले पाएको अवसर सदुपयोग गर्न नसक्दा युभेन्टस खेलमा फर्कनबाट चुक्यो । लगत्तै एन्टोइन ग्रिजमनको प्रहार पोस्टभन्दा थोरैले बाहिरिंदा बार्साले अग्रता दोब्बर पार्न सकेन । खेलको ८५ औं मिनेटमा युभेन्टस १० खेलाडीमा सिमित भयो । युभेन्टसका डिफेन्डर मरिह डेमीरालले दोहोरो पहेंलो कार्ड पाउँदै मैदान छाड्न बाध्य भएका थिए ।

खेलको अन्तिम मिनेटमा बार्सिलोनाले पेनाल्टी प्राप्त गर्यो । फेडेरिको बर्नाडेस्कीले अन्सु फातीलाई पेनाल्टी क्षेत्रभित्र लडाएपछि रेफ्रीले पेनाल्टी दिएका थिए । उक्त पेनाल्टीमा कप्तान लिओनेल मेस्सीले गोल गर्दै जित सुनिश्चित गरे । इन्ज्युरी समयमा फातीले सुवर्ण अवसर सिर्जना गरेपनि आफैं प्रहार नगरी पास दिन खोज्दा गोल गर्नबाट चुके ।

यस जितसँगै बार्सिलोनाको २ खेलमा ६ अंक भएको छ । युभेन्टस भने २ खेलमा ३ अंकसहित दोस्रो स्थानमा छ । समान १-१ अंक जोडेको किएभ र फेरेन्कभरोस भने तेस्रो र चौथो स्थानमा छन् । किएभ र फेरेन्कभरोसको खेल २-२ को बराबरीमा टुंगिएको हो ।

यो पनि : रासफर्डको ह्याट्रिकमा युनाइटेडको सानदार जित