एजेन्सी – स्पेनिस कप्तान तथा सेन्टर ब्याक सर्जियो रामोसले रियल म्याड्रिडबाट १ सय गोलको आँकडा पार गरेका छन् ।

मंगलबार राति च्याम्पियन्स लिगको समूह चरणको तेस्रो खेलमा इटालियन प्रतिद्वन्द्वी इन्टर मिलानविरुद्ध एक गोल गर्दै रामोसले म्याड्रिडमा १ सय गोलको आँकडा पार गरेका हुन् । यस्तै उनी रियलबाट १ सय गोल गर्ने १९औं खेलाडी बनेका छन् ।

रियलबाट १ सय गोल पुरा गर्नेमा १५ जना फरवार्ड, दुई मिडफिल्डर र रामोससँगै फर्नान्डो हिएरो छन् । तर, ५२ वर्षीय हिएरोले रियलमा मिडफिल्डबाट खेलेका थिए । त्यसैले ३४ वर्षीय रामोस रियलबाट १ सय गोल गर्ने पहिलो डिफेन्डर बनेका छन् ।

उनले १५ वर्ष रियलमा बिताएका छन् । उनले २००५ डिसेम्बर ६ मा ओलम्पियाकोसविरुद्धको च्याम्पियन्स लिगकै खेलमा हेडर मार्फत गोल गरेका थिए । राहुल ब्राभोको फ्रिकिकलाई रामोसले हेडरमार्फत गोलको दिशा दिएका थिए । रियलको महत्वपुर्ण सदस्यबनिसकेका रामोसले हरेक सिजनमा रियलबाट गोल गरेका छन् । उनले गत सिजन सर्वाधिक ११ गोल गरेका थिए ।

क्लबकै लेजेन्ड तथा सुपरस्टार पोर्चुगिज फरवार्ड क्रिस्टियानो रोनाल्डोले २०१८ मा क्लब छाडेयता उनी नै रियलको पेनाल्टी टेकर बन्दा उनको गोल संख्या बढेको हो । उनले नयाँ सिजनको स्पेनिस ला लिगामा ३ गोल गरिसकेका छन् ।