हाम्री खेलकुद – २०१६/१७ सिजनको च्याम्पियन्स लिगको समूह चरणको खेल मंगलबार बाट सुरु हुदैं छन्। बार्सिलोना र सेल्टिकबीचको खेल नेपाली समयानुसार बुधबार विहान १२:३० बजे सुरु हुनेछ।
स्पेनिश लिगमा अलाभेससंग २-१ले पराजय भोगेपछि बार्सिलोनालाई यस खेलमा जित हात पार्नैपर्ने दवाव रहेको छ। उक्त खेलमा मेसि, सुआरेज र नेयमार तीनैजना दोश्रो हाफमा मैदान प्रवेश गरेका थिए। तर आजको खेलमा भने प्रशिक्षक लुइस एन्रिकेले तिनै स्टार खेलाडीलाई मैदानमा सुरुवाती एघारमा राख्ने पक्का छ।
सेल्टिक भने घरेलु लिगमा चिर प्रतिद्वदी रेंजर्सलाई ५-१ ले पराजित गरेकोले यस खेलमा सकारात्मक भएर मैदानमा उत्रनेछ। सेल्टिक र बार्सिलोनाले प्रि सिजनमा खेलेको मैत्रीपूर्ण खेलमा बार्सिलोना ३-१ले विजयी भएको थियो।
यसअघी २०१३मा च्याम्पियन्स लिग अन्तर्गतको खेलमा भने बार्सिलोनाले सेल्टिकलाइ ६-१ले पराजित गरेको थियो। सन् २०१२मा सेल्टिकको पार्कहेड रंगशालामा ७०% भन्दा बढी बल पोसेसन हुँदा पनि बार्सिलोनाले सेल्टिकसंग २-१को हार व्यहोरेको थियो।
