एजेन्सी – पोर्चुगिज युवा फरवार्ड जोआओ फेलिक्सको दुई गोल र एक असिस्टमा एट्लेटिको म्याड्रिडले स्पेनिस ला लिगामा क्याडिजमाथि सानदार जित निकालेको छ ।

घरेलु मैदानमा मार्काेस लोरेन्टे र लुइस सुआरेजले पनि गोल थपेपछि एट्लेटिको म्याड्रिडले क्याडिजमाथि ४–० को सानदार जित निकाल्न सफलल भएको हो ।

यो जितसँगै एट्लेटिको ७ खेलबाट १७ अंक जोडेर शीर्षस्थानमा उक्लिएको छ । समान १७ अंक नै रहेपनि एक खेल बढी खेलेको रियल सोसिडाड गोलअन्तरमा दोस्रो स्थानमा झरेको छ । पराजित क्याडिज १४ अंक जोडेर छैटौ स्थानमा रहेको छ ।

स्टेडियो वान्डा मेट्रोपोलिटानोमा शनिबार राति भएको खेलमा घरेलु टोलीले खेलको आठौं मिेनटमा फेलिक्सको गोलबाट अग्रता लिएको थियो । उनले गोलरक्षक जेरेमियासको गल्तीमा मार्काेस लोरेन्टेको क्रस पासमा हेडरमार्फत जाली चुमाएका थिए ।

२२औं मिनेटमा लोरेन्टेले गोल गर्दै एट्लेटिकाको अग्रता दोब्बर बनायो । २८औं मिनेटमा साल्भी सान्चेजको कर्नरमा सुआरेजलाई डिफ्लेक्ट हुदै आएको बललाई फालीले प्रयास गरेपनि सदुपयोग गर्न सकेन ।

३२औं मिनेटमा सउल निग्वेजले गोल गरेपनि किरिएन ट्रिपिएर अफसाइड पोजिसनमा रहँदा गोलले मान्यता पाएन । ५१औं मिनेटमा फेलिक्सको पासमा सुआरेजले गोल गर्दै एट्लेटिकोलाई ३–० ले अघि बढाए । सुआरेजको यो छैटौ खेलमा पाँचौ गोल हो ।

६५औं मिनेटमा फालीको क्रसलाई एट्लेटिकोका गोलरक्षक जान ओब्लाकले नियन्त्रणमा लिदै क्याडिजलाई निराश पारे । ९०औं मिनेटमा जोआओ फेलिक्सले एन्जल कोरेराको पासमा गोल गर्दै एट्लेटिकोलाई ४–० को सहज जित दिलाए । उनले जारी सिजनको ला लिगामा ७ खेलमा ५ गोल गर्नुका साथै २ असिस्ट दिइसकेका छन् ।