एजेन्सी – इंग्लिस क्लब चेल्सीका फरवार्ड टिमो वेर्नरले दुई गोल गरेपछि जर्मनीले नेसन्स लिग अन्तर्गत शनिबार भएको समूह ए४ को खेलमा युक्रेनलाई ३-१ ले पराजित गरेको छ ।

जर्मनीको लाइप्जिगमा भएको खेलमा पाहुना टोली युक्रेनले सुरुवाती अग्रता बनाएको थियो । १२ औं मिनेटमा एलेक्जेन्डर जुब्कोभको पासमा रोम यारेमचुकले गोल गर्दै जर्मनीलाई स्तब्ध पारेका थिए ।

खेलमा पछि परेको १० मिनेटपछि नै जर्मनी लेरोय सानेको गोलमा बराबरी गर्न सफल रहयो । सानेले लिओन गोरेट्जकाको पासमा गोल गरेका थिए । पहिलो हाफको ३३ औं मिनेटमा गोरेट्जकाकै क्रसमा वेर्नरले हेडरमार्फत गोल गर्दै जर्मनीलाई अग्रता दिलाए ।

दोस्रो हाफको ६४ औं मिनेटमा मथिअस जिन्टरको पासमा वेर्नरको प्रहार डिफेन्डरलाई लाग्दै गोल भएपछि जर्मनीले जित पक्का गरेको थियो । जर्मनीले बल पोसेसन र आक्रमणमा पकड कायम गर्दै दबाब बनाएपनि गोलरक्षक आन्द्रे प्यातोभले केहि राम्रो बचाउ गरे ।

समूह ए४ मा जर्मनी यस जितसहित शीर्षस्थानमा उक्लेको छ । जर्मनीको ९ अंक तथा स्पेनको ८ अंक रहेको छ । अब मंगलबार जर्मनी र स्पेनबीचको विजेताले सेमिफाइनलमा पुग्ने टोलीको टुंगो लाग्नेछ । यस्तै ६ अंक बोकेको युक्रेन र ३ अंक जोडेको स्विटजरल्यान्डबीच पनि रेलिगेसनबाट जोगिन प्रतिस्पर्धा हुनेछ ।

यो पनि पढ्नुहोस : रामोसले दुई पेनाल्टी चुकाउँदा स्पेन रोकियो