एजेन्सी – स्पेनिस ला लिगामा आज राति दुई शहरी प्रतिद्धन्द्धी रियल म्याड्रिड र एट्लेटिको मड्रिडबीच प्रतिस्पर्धा हुँदैछ ।

खेल रियलको मैदान अल्फ्रेडो डि स्टेफानोमा नेपाली समयअनुसार राति १ः४५ बजे हुनेछ । घरेलु मैदानमा हुने खेलमा रियल एट्लेटिकोलाई पराजित गर्दै शीर्ष टोलीसँगको अंक दुरी छोट्याउने लक्ष्यमा हुनेछ ।

ला लिगामा औसतको प्रदर्शन गरिरहेको रियल ११ खेलबाट २० अंक जोडेर चौथो स्थानमा रहेको छ । शीर्षस्थानमा रहेको एट्लेटिकोको २६, रियल सोसिडाडको २५ तथा भिल्लारियलको २१ अंक रहेको छ । एट्लेटिकोमाथि जित निकाल्न सके रियाल तेस्रो स्थानमा उक्लदै शीर्षस्थानमा रहेको एट्लेटिकोसँगको अंक दुरी ३ अंकमा झार्नेछ ।

पछिल्लो दुई खेलमा जित निकाल्दै आफ्नो लयमा फर्किने संकेत दिएको रियल एट्लेटिकोलाई पनि हराउने दाउमा हुनेछ । रियालसँग बोरुसिया मोन्चेनग्लाडवाकविरुद्ध दुई गोल गरेका फरवार्ड करिम बेन्जेमा, भिनिसियस जुनियर, रोड्रिगो गोएस, मार्काे एसेन्सियो, टोनी क्रुस, लुका मोड्रिच, क्यासमिरो, फर्लान्ड मेन्डी, कप्तान सर्जियो रामोस, राफयल भरान र गोलरक्षक थिवाउट कोर्टुवाको साथ रहेको छ ।

चोटपछि ड्यानी कार्भाहल र फेडरिको भाल्भेर्डेले पूनरागमन गर्न सक्दा टोलीसँग इस्को, लुकास भास्क्वेज र मार्सेलोपनि टोलीसँग रहेको छ । चोटका कारण इडेन हाजार्ड, लुका जोभिक र मारियानो डियाज टोलीसँग हुने छैनन् ।

यता ला लिगामा अपराजित एक्लो टोली एट्लेटिको मड्रिड पनि रियाललाई उसकै मैदानमा स्तब्ध पार्दै आफ्नो शीर्षतामा थप पकड बनाउने दाउमा हुनेछ । शीर्षस्थानमा रहेको एट्लेटिको रियललाई हराउदै आफ्नो शीर्षता थप पकड बनाउने लक्ष्यमा हुनेछ । रियललाई हराए एट्लेटिको शीर्षस्थानमा रियल सोसिडाडलाई ४ अंकले पछि पार्नेछ ।

टोलीसँग जोआओ फेलिक्स, लुइस सुआरेज, यान्निक कारास्को, सउल निग्वेज, कोकी, मार्काेस लोरेन्टे, रेनन लोडी, फिलिपे, स्टेफान साभिक, किरिएन ट्रिपिएर र गोलरक्षक जान ओब्लाको साथ रहेको छ । यस्तै मारियो हार्माेसो, एन्जेल कोरेए र लेमार पनि टोलीसँग रहेको छ ।

ला लिगाको उपाधिको यात्राको लागि दुवै टोलीलाई यो खेल निकै महत्वपुर्ण छ । त्यसैले दुवै टोली ३ अंककै लागि मैदान उत्रनेछ । यि दुई टोलीको पछिल्लो ३८ खेलको नतिजा हेर्दा रियाल १६ खेलमा विजयी हुदा एट्लेटिकोले १० खेल आफ्नो पक्षमा पारेको छ । १२ खेल बराबरीमा सकिएको छ ।

रियल पछिल्लो तीन खेलमा एट्लेटिकोसँग अपराजित रहेको छ । रियल सोही अपराजित यात्रालाई निरन्तरता दिने दाउमा रहँदा एट्लेटिको रियलको यात्रामा पूर्णविराम लागाउने लक्ष्यमा हुनेछ ।

अन्य खेल

भ्यालेन्सियाविरुद्ध एथलेटिको विल्वाओ (साँझ ६ः४५ बजे), गेटाफेविरुछ सेभिया (राति ९ः०० बजे), हुएस्काविरुद्ध एलाभेस (राति ११ः१५ बजे)