एजेन्सी – इंग्लिस प्रिमियर लिगको म्यानचेस्टर डर्वी म्यानचेस्टर युनाइटेड र म्यानचेस्टर सिटीबीचको खेल गोलरहित बराबरीमा टुंगिएको छ ।

म्यानचेस्टर युनाइटेडको घरेलु मैदान ओल्डट्राफोर्डमा शनिबार राति भएको प्रतिस्पर्धात्मक खेलमा दुवै टोलीले गोलका केही अवसर सिर्जना गरेपनि गोल गर्न नसक्दा अंक बाड्न बाध्य बनेको हो ।

खेलको ११औं मिनेटमा लुका साको कर्नरमा भिक्टोर लिन्डेलफको फ्लिक गरेको बललाई स्कट म्याकटोमिनेले गरेको प्रहार बाहिरिदा युनाइटेड अग्रता लिनबाट चुक्यो । २५औं मिनेटमा रियाद महारेजको पासमा गाब्रियल जेससको प्रहार क्रसबारमा लागेर बाहिरिदा सिटीले अग्रता लिन सकेन ।

३५औं मिनेटमा जेससको पासमा केभिन डि ब्रुयनले मिलाइदिएको पासलाई रियाद महारेजले गरेको प्रहारलाई युनाइटेडक गोलरक्षक डेभिड हे गेयाले सहजै बचाए । ४७औं मिनेटमा केएल वाल्करले पेनाल्टी बक्समा मार्कुस रासफोर्डलाई फल गरेको भन्दै युनाइटेडले पेनाल्टी अपिल गरेपनि भिएहारबाट मान्यता पाएन ।

६८औं मिनेटमा जेससकै पासमा केभिन डि ब्रुयनको प्रहारलाई युनाइटेडका डिफेन्डरले कुनै खतरा हुन दिएन । ८८औं मिनेटमा एन्थोनी मार्सियलको पासमा ब्रुनो फर्नान्डेसको प्रहारलाई सिटीका गोलरक्षक इडर्सन मोराएसले बचाउदै खेललाई गोलरहित बराबरीमा सकाए ।

यो बराबरीसँगै युनाइटेड २० अंक जोडेर आठौं स्थानमा रहँदा सिटी १९ अंकसहित नवौं स्थानमा रहेको छ ।