एजेन्सी – जर्मन बुन्डेसलिगामा शीर्षस्थानमा रहेको बायर्न म्युनिख बराबरीमा रोकिँदा बोरुसिया डर्टमुन्डले घरेलु मैदानमै लज्जास्पद हार बेहोरेको छ ।

शनिबार राति भएको खेलमा बायर्न युनियन बर्लिनसँग उसकै मैदानमा १–१ गोलको बराबरीमा रोकिएको हो । घरेलु टोली युनियन बर्लिनका ग्रिस्चा पोर्मेलले गोल गर्दा बायर्नका रोबर्ट लेवान्डोस्कीले बराबरी गोल फर्काएका थिए ।

खेलको चौथो मिनेटमा नै ग्रिस्चा पोर्मेलले क्रिस्टोफोर ट्रिमेलको पासमा गोल गर्दै युनियन बर्लिनलाई अग्रता दिलाएका थिए । तर, बायर्नका लेवान्डोस्कीले ६७औं मिनेटमा किङ्सले कोमानको पासमा गोल गर्दै खेललाई १–१ गोलको बराबरीमा ल्याए ।

त्यसपछि थप गोल निस्कन नसक्दा खेल १–१ गोलको बराबरीमा टुंगियो । यो बराबरीले बायर्न ११ खेलबाट २४ अंक जोडेर शीर्षस्थानमा यथावत छ । समान २४ अंक नै रहेपनि आरबी लाइप्जिग गोलअन्तरमा दोस्रो स्थानमा रहेको छ । युनियन बर्लिन १७ अंकसहित छैटौ स्थानमा छ ।

यस्तै बुन्डेसलिगाकै अर्काे खेलमा बोरुसिया डर्टमुन्डले घरेलु मैदानमा भिएफबी स्टुटगार्टसँग ५–१ को लज्जास्पद हार बेहोरेको छ । चोटका कारण एर्लिङ हालान्डको अनुपस्थितिमा खेलमा डर्टमुन्ड कमजोर सावित भयो ।

डर्टमुन्डलाई फराकिलो हार चखाउन स्टुटगार्टका सिलास वामांगीटुका फुन्डुले दुई तथा फिलिप फोर्सटर, टांगी काउलेवेली र निकोलस गोन्जालेजले गोल गरे । डर्टमुन्डका जियोभानी रेनाले एक गोल फर्काए । उनको एक गोलले भिएआरबाट मान्यता पाएन ।

यो हारसँगै डर्टमुन्ड १९ अंक जोडेर पाँचौ स्थानमा झर्दा स्टुटगार्ट १७ अंक जोड्दै सातौ स्थानमा रहेको छ ।

अन्य नतिजा

होफेनहाइनविरुद्ध अग्सवर्ग (३–१), वल्फ्सवर्गविरुद्ध फ्रान्कफर्ट (२–१), बोरुसिया मोन्चेनग्लाडवाकविरुद्ध हर्था बर्लिन (१–१), फ्रेइवर्गविरुद्ध अर्मेनिया (२–०), मेइन्जविरुद्ध कोल्न (०–१), आरबी लाइप्जिगविरुद्ध वेर्डर ब्रेमेन (२–०)