एजेन्सी – स्पेनिस ला लिगामा आज राति क्याटलान क्लब बार्सिलोनाले लेभान्टेको सामना गर्दैछ । खेल नोउक्याम्पमा राति १ः४५ बजे हुनेछ ।

घरेलु मैदानमा हुने खेलमा बार्सिलोना लेभान्टेलाई पराजित गर्दै अंक तालिका सुधार गर्ने लक्ष्यमा हुनेछ । ला लिगामा औसतको प्रदर्शन गरिरहेको बार्सिलोना १० खेलबाट १४ अंक जोडेर नवौं स्थानमा रहेको छ । जुन शीर्षस्थानको एट्लेटिको म्याड्रिडभन्दा १२ अंकले पछि हो ।

लेभान्टेलाई हराए बार्सिलोना १७ अंक जोडेर सातौं स्थानमा उक्लनेछ । बार्सिलोनासँग कप्तान लियोनेल मेस्सी, एन्टोइन ग्रिजमन, फिलिपे कौटिन्हो, पेड्री, फ्रान्की डि जोङ, जोर्डी अल्बा, क्लेमेन्ट लेङलेट, सर्जिनो डेस्ट, रोनाल्ड एराउजो र गोलरक्षक मार्क आन्दर टेर स्टेगनको साथ रहेको छ ।

यता, लेभान्टे पनि बार्सिलोनालाई स्तब्ध पार्दै रेलिगेसन जोन छाड्ने लक्ष्यमा हुनेछ । लेभान्टे ११ अंक जोडेर १८औं स्थानमा रहेको छ । टोलीसँग मोरालेस, रेगर, रोचिना, मेलेरो, भेजो, कोकी र एइटरको साथ रहेको छ ।

यि दुई टोलीको पछिल्लो २२ खेलको नतिजा हेर्दा बार्सिलोना १७ खेलमा विजयी भएको छ । लेभान्टेले ३ खेल आफ्नो पक्षमा पारेको छ । २ खेल बराबरीमा सकिएको छ । गत सिजन यि दुई टोलीले १–१ खेलमा जित हात पारेका थिए ।