एजेन्सी – फ्रेन्च लिग वानमा पेरिस सेन्ट जर्मेन (पीएसजी) घरेलु मैदानमै लियोनसँग १–० ले स्तब्ध बनेको छ । बल पोसेसनमा बलियो पकड बनाएपनि फिनिसिङमा चुक्दा पीएसजीले लिगमा चौथो हार बेहोर्न पुग्यो ।

पार्क डि प्रिन्सेसमा आइतबार राति भएको खेलमा घरेलु टोलीले खेलको सातौ मिनेटमा अग्रता लिने सुवर्ण अवसर खेर फालेको थियो । फ्लोरेन्जीको पासमा मोइस किनको प्रहार पोस्ट नजिकैबाट बाहिरिएको थियो ।

३५औं मिनेटमा टिनो काडेवेरले गोल गर्दै लियोनलाई अग्रता दिलाए । उनले कार्ल टोको इकाम्वीके पासमा गोल गरेका थिए । ६०औं मिनेटमा काडेवेर नै चुक्दा लियोनले अग्रता दोब्बर पार्न सकेन ।
७०औं मिनेटमा नेयमारको प्रहारलाई लियोनको गोलरक्षक लोपेसले बचाउदै बराबरी टारे ।

९०औं मिनेटमा गोलरक्षक लोपेस नै बाधक बन्दा पीएसजीले खेललाई आफ्नो पक्षमा पार्न सकेन । इन्ज्युरी समयको थप गरिएको दोस्रो मिनेटमा केलियन एमबाप्पेको प्रहार पोस्ट नजिकैबाट बाहिरियो ।

इन्ज्युरी समयको थप गरिएको नवौं मिनेटमा लियोनका थियागो मेन्डेस सिधै रातो कार्ड खादै मैदानबाट बाहिरिए । नेयमारमाथि गम्भीर फल गरेपछि रेफ्रीले सुरुमा पहेलो कार्ड देखाएपनि भिएआरको सहायता लिदै रातो कार्ड दिदै मैदान बाहिर पठाएको थियो ।

यो हारसँगै पीएसजी शीर्षस्थानबाट तेस्रो स्थानमा झरेको छ । शीर्षस्थानको लिलको २९ तथा दोस्रो स्थानको लियोनको पनि २९ अंक नै रहेको छ । पीएसजीको २८ अंक रहेको छ ।