एजेन्सी – इंग्लिस प्रिमियर लिग अन्तर्गत आइतबारको खेलमा लेस्टर सिटीले टोटेनहम हट्स्परको मैदानमा २-० को जित दर्ता गरेको छ ।

जोसे मोउरिन्होको प्रशिक्षणमा रहेको टोटेनहमले लगातार ११ खेलमा अपराजित नतिजा निकालेपनि पछिल्लो दुई खेलमा भने लगातार हार बेहोर्न बाध्य भयो । टोटेनहम अघिल्लो साता लिभरपुलसँग २-१ ले पराजित हुँदै अंक तालिकाको शीर्षस्थानबाट खसेको थियो । आजको हारले भने टोली चौथो स्थानमा आइपुगेको छ ।

लेस्टरले पहिलो हाफको इन्ज्युरी समयमा जेमी भार्डीको पेनाल्टीमा अग्रता लिएको थियो । डिफेन्डर सर्ज औरीएरले वेस्ली फोफानालाई पेनाल्टी क्षेत्रभित्र लडाएपछि रेफ्रीले भीएआरको सहायता लिएर पेनाल्टी दिएका थिए । भार्डीले उक्त पेनाल्टीमा गोल गर्दै टोलीलाई अघि बढाए ।

दोस्रो हाफको सुरुवातमा जेम्स म्याडीसनले गोल गरेपनि भीएआरले अफसाइड दिएपछि खेल १-० मै रहेको थियो । तर ५९ औं मिनेटमा लेस्टर अग्रता दोब्बर पार्न सफल रहयो । मार्क अल्ब्राइटनको क्रसमा भार्डीको हेडर टोबी एल्डरवेरल्डलाई लाग्दै गोलमा परिणत भएको थियो । बल पोसेसनमा पकड जमाएपनि टोटेनहमले आक्रमणमा अवसर सदुपयोग गर्न नसक्दा हार बेहोर्यो ।

यस नतिजासँगै लेस्टर १४ खेलमा २७ अंकसाथ दोस्रो स्थानमा उक्लिएको छ । टोटेनहमको १४ खेलमा २५ अंक रहेको छ । लिभरपुलको ३१ अंक रहेको छ ।