एजेन्सी – फ्रेन्च लिग वानमा पेरिस सेन्ट जर्मेन (पीएसजी) र लिलले गोलरहित बराबरी खेल्दै अंक बाँडेका छन् ।

चोटका कारण नेयमार नहुदा र अर्का फरवार्ड केलियन एमबाप्पेलाई विश्राम दिइएको खेलमा पीएसजी लिलसँग बराबरीमा रोकिएको हो ।

बल पोसेसनमा बलियो पकड बनाएपनि पीएसजीले खेलको ४१औं मिनेटमा गोलको सुवर्ण अवसर खेर फालेको थियो । मोइस किनको प्रहारलाई घरेलु टोली लिलका गोलरक्षक माइगनानले बचाएका थिए । पहिलो हाफको इन्ज्युरी समयमा राफिन्हाको फ्रिकिकमा प्रेसनेल केम्पेम्वेको प्रहार पोस्ट नजिकैबाट बाहिरियो ।

प्रशिक्षक थोमस टुचेलले ७७औं मिनेटमा एमबाप्पेलाई मैदानमा उतारेपनि गोल गर्न नसक्दा पीएसजी जितबाट वञ्चित बन्यो । पीएसजीले लिलविरुद्ध ७० प्रतिशत बल पोसेसन राखेको थियो ।

लिग वानमा पीएसजीको यो दोस्रो बराबरी हो । यसअघि पीएसजीले बोर्डेअक्ससँग २–२ गोलको बराबरी खेलेको थियो । पीएसजीले १६ खेल खेल्दा १० जित, दुई बराबरी र ४ हारको नतिजा निकालेको छ ।

यो बराबरीले पीएसजीले शीर्षस्थानमा उक्लने सुवर्ण अवसर खेर फाल्दा लिलले गोल अन्तरमा लियोनलाई पछि पार्दै शीर्षस्थानमा उक्लिएको छ ।

लिलको १६ खेलबाट ३३ अंक पुगेको छ । समान खेलबाटै लियोनको पनि ३३ अंक नै छ । पीएसजी ३२ अंक जोडेर तेस्रो स्थानमा यथावत छ ।