एजेन्सी – स्पेनिस ला लिगामा आज राति विभिन्न पाँच खेलमा प्रतिस्पर्धा हुँदैछ । शीर्षस्थानमा रहेको एट्लेटिको म्याड्रिडले उच्च लयमा रहेको रियल सोसिडाडको भ्रमण गर्दा क्याटलान क्लब बार्सिलोनाले रियल भालाडोलिडसँग खेल्दैछ ।

सोसिडाड र एट्लेटिकोबीचको खेल नेपाली समयअनुसार राति १२ः३० बजे हुनेछ । घरेलु टोलीलाई पराजित गर्दै एट्लेटिको म्याड्रिड शीर्षस्थानमा स्पष्ट अग्रता लिने दाउमा हुनेछ । १२ खेलबाट २९ अंक जोडेको एट्लेटिको शीर्षस्थानमा रहेको छ । समान अंक भएपनि गोलअन्तरमा रियल म्याड्रिड दोस्रो स्थानमा रहेको छ ।

रियल सोसिडाडलाई हराउन सके एट्लेटिकोले शीर्षस्थानमा तीन अंकको स्पष्ट अग्रता लिनेछ । बराबरीले १ अंकको तथा हारले समान अंक भएपनि गोलअन्तरमा एट्लेटिको नै अघि रहनेछ ।
टोलीसँग लुइस सुआरेज, जोआओ फेलिक्स, डिएगो कोस्टा, एन्जल कोरेया, मार्काेस लोरेन्ट, यान्निक कारास्को, कोकी, लेमार, किरियन ट्रिपिएर, लोडी र गोलरक्षक जान ओब्लाकजस्ता नाम चलेका खेलाडीको साथ रहेको छ ।

यता, रियल सोसिडाड पनि घरेलु मैदानमा एट्लेटिकोलाई पराजित गर्दै शीर्ष दुई टोलीसँग अंक बराबरी गर्ने लक्ष्यमा हुनेछ । एट्लेटिकोलाई हराउन सके सोसिडाडले गोलअन्तरमा रियल म्याड्रिडलाई पछि पार्दै दोस्रो स्थानमा उक्लनेछ ।

टोलीसँग एलेक्सान्डर इसाक, राबर्टाे लोपेज, क्रिस्टियन पोर्टु, मिकेल मेरिनो, नाचो मोनरियल, विलियन जोस, मार्टिन जुवीमेन्डी, नोरमान्ड र गोलरक्षक एलेकस रिमिरोको साथ रहेको छ । टोलीले पछिल्लो आठ खेलमा जित निकाल्न सकेको छैन । त्यसैले पनि रियल सोसिडाड एट्लेटिकोविरुद्ध जित निकाल्ने लक्ष्यमा मैदान उत्रनेछ ।

पछिल्लो दुई खेलमा बार्सिलोना र लेभान्टेसँग पराजित भएको सोसिडाडले त्यसअघिको ६ खेल बराबरी खेलेको थियो । यि दुई टोलीको २१ खलको नतिजामा १४ खेल एट्लेटिकोले आफ्नो पक्षमा पारेको छ । ५ खेल रियल सोसिडाडले जित्दा २ खेल बराबरीमा सकिएको छ । गत सिजन दुई खेल खेल्दा सोसिडाडले एक खेल आफ्नो पक्षमा पार्दा एक खेल बराबरीमा सकिएको थियो ।

अन्य खेल : इल्चेविरुद्ध ओसासुना (राति १०ः१५ बजे), भ्यालेन्सियाविरुद्ध सेभिया (राति १०ः१५ बजे), हुएस्काविरुद्ध लेभानटे (राति १२ः३० बजे), रियल भालाडोलिडविरुद्ध बार्सिलोना (राति २ः४५ बजे)