एजेन्सी – बार्सिलोनाका कप्तान लिओनल मेस्सी क्लब अहिले निराशा जनक अवस्थामा रहेको बताउँछन् । यो अवस्थाबाट फर्कन मैदान भित्र र बाहिर दुवै तिर कठीन रहेको पनि मेस्सी मान्छन् ।

‘म आउने सबै चुनौतीलाई सामना गर्न लड्नेछु । क्लब अहिले साच्चै कठीन अवस्थामा छ,’ भर्खरै प्रसारित अन्तवार्तामा मेस्सीले भनेका छन्, ‘क्लबका वरिपरिका वातावरण चुनौतीपूर्ण छ । पुरानै अवस्थामा पुग्न हाम्रा लागि कठीन छ ।’

यहि क्लब गहिरो संकटमै फस्दै गर्दा गत सिजनको अन्त्यमा मेस्सीले भने क्लब छाड्न चाहेका थिए । यद्दपी उनको त्यो चाहना पूरा हुन सकेन । त्यो विषयलाई थाती राख्दै मेस्सी क्लबलाई सफलता दिलाउनेमा केन्द्रित रहे ।

‘मैले अध्यक्षलाई पटक पटक क्लब छाड्न चाहेको बताएको थिए । मैले औपचारिक रुपमा पनि भनेको थिए । म सोच्थे अब परिवर्तनको समय आएको छ ,’ उनले भने, ‘क्लबमा पनि परिवर्तन आवश्यक छ र युवा खेलाडीका लागि ठाँउ खाली गर्नुपर्दछ । म च्याम्पियन्स लिग र ला लिगाको लागि लड्न चाहन्थे । म छाड्न चाहन्थे ।’

मेस्सीले क्लब छाड्न विषय आफ्ना लागि पनि सहज नभएको स्वीकार गरे । उनले आफ्नो परिवार पनि बार्सिलोना शहर छाडेर अन्त सर्न तयार नरहेको पनि उनले सुनाए । लुइस सुआरेजले क्याम्प नोउ छाड्न परेको प्रसंगले पनि मेस्सीलाई निकै दुःखी तुल्याएको थियो ।

जनवरी १ बाट सरुवा बजार खुला हुँदैछ । अब मेस्सी आफ्नो नयाँ यात्राका लागि छलफल गर्न सक्छन् । तर, उनीले अहिले सरुवाका विषयमा नसोचेको प्रष्ट पारेका छन् । ‘सिजनको अन्त्य सम्ममा के गर्ने भन्ने विषयमा म टुंगोमा पुगेको छैन,’ उनले भने, ‘म सिजनको अन्त्य सम्म कुर्ने छु । अहिलेका लागि भने म उपाधिमा केन्द्रित छु । त्यो बाहेक अरु सोचेको छैन ।’