ललितपुर (हाम्रो खेलकुद) – मिलन लामा, क्षितज भण्डारी, रुपेश जैसवाल र पुरुषोत्तम सिलवाल नवौं गणेशमान सिंह स्मृति राष्ट्रिय रेटिङ क्लासिकल बुद्धिचाल प्रतियोगिताको नकआउट चरणमा पुगेका छन् ।

चौथो दिन सोमबार सातौं चरणको खेल सम्पन्न शीर्ष ४ खेलाडीले २ लाख ५४ हजार ९ सय रुपैयाँ बराबरको यामाहा सलुटो मोटरसाइकलका लागि प्रतिस्पर्धा गर्नेछन् ।

नेपाल लोकतान्त्रिक खेलकुद संघ र ललितपुर स्पोर्ट्स क्लबको संयुक्त आयोजनामा सञ्चालन भइरहेको बुद्धिचाल प्रतियोगितामा शीर्ष ४ खेलाडी बिच भोलि गोला प्रथाबाट १/४ र २/३ गरि सेतो र कालो गोटी लिएर खेल हुनेछन् । प्रतियोगिताको दोस्रो खेलाडीले ८०, तेस्रोले ५० र चौथोले ३० हजार रुपैयाँ प्राप्त गर्नेछन् ।

प्रतियोगितामा कुल ६ लाख ३७ हजार ४ सय रुपैयाँ पुरस्कार रहेको छ । आठौं संस्करणका विजेता सिएम मिलन लामा ६.५ अंक लिएर एकल अग्रताका साथ सेमिफाइनलमा प्रवेश गरेका हुन् ।

मिलनले अन्तिम लिग खेलमा क्षितिजसँग १६ चाल चलि सहज समझदारी बराबर गरेका थिए । मिलनको बराबर प्रस्ताव १५ चाल खेलि स्वीकार गरेका सिएम क्षितिज ६ अंक बनाउँदै सेमिफाइनल प्रवेश गरेका हुन् । यसअघि उनले ४.५ अंकबाट खेल्दै काठमाडौंका भेट्रान खेलाडी जनार्दन श्रेष्ठलाई पराजित गरेका थिए ।

दोस्रो बोर्डमा सेतो गोटी ई फो बाट खेल शुरु गरेका झापाका राजन सुवेदीलाई सिफाइभ सिसिलियन जवाफ फर्काएका नेपाल च्याम्पियन रुपेश जैसवाल जित्नै पर्ने दबाबमा थिए । राजन सुवेदी ५ अंकबाट खेल्दै रुपेश संग .५ अंक खोसेर डाइरेक्ट इन्काउन्टर बुचोल्ज कटवान कटटु प्रोग्रेसिभको आधारमा छनौट हुन चाहन्थे। तर रुपेशले चार घण्टा लामो खेलमा राजन सुवेदीलाई पराजित गर्दै ६ अंक जोडेर सुपर नकआउट सेमिफाइनल प्रवेश गर्न सफल भएका छन्।

केशव श्रेष्ठ संग बराबर गरि ५ अंक बनाएका युवा च्याम्पियन पुरुषोत्तम सिलवालले अन्तिम लिगमा तीन पटकका नेपाल च्याम्पियन बद्रीलाल नेपालीलाई कठिन खेलमा पराजित गर्दै ६ अंकका साथ अन्तिम चारको यात्रा तय गरे । १ सय १५ राष्ट्रिय तथा अन्तर्राष्ट्रिय खेलाडीको सहभागिता रहेको प्रतियोगितामा सातौं चरणपछि ४ खेलाडी नकआउट र बाँकीले सुपर लिग खेल खेल्ने छन् ।

नौं चरणको लिगको विजेताले २५ हजार, दोस्रोले १५ हजार र तेस्रो खेलाडीले १० हजार रुपैयाँ पाउनेछन् । शीर्ष १५ सम्म आउने खेलाडीले खेलाडीले पुरस्कार प्राप्त गर्नेछ । त्यसैगरी विभिन्न विधामा थप २१ जना खेलाडीहरुले समेत पुरस्कार पाउने छन्।