एजेन्सी – इर्लिङ हालान्डले युरोपियन फुटबलका एक प्रतिभावान खेलाडी रहेको प्रमाणित गरिसकेका छन् । बोरुसिया डर्टमन्डका फरवार्ड रियल म्याड्रिड जाने चर्चा समय समयमा चल्ने गरेको छ । सरुवा बजार खुल्ने क्रममा त्यो चर्चा फेरि चलिरहेको छ ।

आरबी साल्जबर्गबाट डर्टमन्ड पुगेयता नर्वेजियन फरवार्डले स्तरीय सेन्टर ब्याकहरुको सामना गरिसकेका छन् । त्यसमध्ये उनले आफूलाई उत्कृष्ट लाग्ने तीन सेन्टर ब्याकका बारेमा चर्चा गरेका छन् । ‘सर्जियो रामोस, भिर्गिल भान डिक र कालिडियो कौलिबाया उत्कृष्ट सेन्टर ब्याकट हुन्,’ हालान्डले भने, ‘उनीहरु निकै शारीरिक रुपमा उत्कृष्ट छन्, तर मैदानमा त्यति नै चलाख पनि ।’

हालान्डले सहकर्मी एवंम् रियलका मार्टिन ओडेगार्डको पनि तारिफ गरेका थिए । हालान्ड अहिले भने चोटका कारण मैदान बाहिर रहँदै आएका छन् । वल्फस्बर्गविरुद्ध हुने खेलमा उनी मैदान फर्कने अपेक्षा गरिएको छ ।

हालान्डले लगातार राम्रो प्रदर्शन गर्दै आफूलाई युरोपकै उत्कृष्ट फरवार्डको सुचिमा उभ्याउन सफल भएका छन् । मात्र २० वर्षको उमेरमा उनले यो उपलब्धि हासिल गर्दा युरोपका ठूला क्लबले पनि उनीमाथि नजर राखेका छन् । पछिल्लो समय विश्व फुटबलमा नम्बर ९ पोजिसनको खेलाडीमा केहि कमी आउँदा हालान्डको उदयले केहि फरकपन ल्याएको छ ।

शारीरिक रुपमा निकै बलिया हालान्डको गति पनि तेज छ । उनको फिनिसिङ उनको खेलको मुख्य पक्ष हो । हालान्डको गोलमा प्रयास गर्ने शैली र गोलमा परिणत गर्दाको सफलता युरोपकै उत्कृष्ट मध्यम पर्छ । पछिल्लो समय उनको अनुपस्थितिमा टोलीको नतिजा खराब हुँदा प्रशिक्षक लुसिएन फाभ्रले बर्खास्ती नै पाए । यसले पनि उनको प्रभाव प्रष्ट पारेको छ ।