एजेन्सी – उरुग्वेली फरवार्ड लुइस सुआरेजको एक गोल र अर्काे असिस्टको सहयोगमा एट्लेटिको म्याड्रिडले १० खेलाडीमा समेटिएको डिपोर्टिभो एलाभेसलाई २–१ ले पराजित गर्दै स्पेनिस ला लिगाको शीर्षस्थानमा फर्किएको छ ।

दुई खेल कम खेलेको एट्लेटिको शहरी प्रतिद्धन्द्धी रियल म्याड्रिडलाई २ अंकले पछि पार्दै शीर्षस्थानमा उक्लिएको हो । एट्लेटिकोको १५ खेलबाट ३८ अंक तथा रियलको १७ खेलबाट ३६ अंक छ । पराजित एलाभेस १८ अंकसहित १४औं स्थानमा छ ।

एलाभेसको मैदानमा आइतबार राति भएको खेलमा एट्लेटिकोले खेलको ४१औं मिनेटमा मार्काेस लोरेन्टेको गोलबाट अग्रता लिएको थियो । लुइस सुआरेजको पासमा लारेन्टेको प्रहार भिक्टर लगाउरडियालाई डिफ्लेक्ट हुदै गोलमा परिणत भएको थियो ।

६३औं मिनेटमा एलाभेस १० खेलाडीमा समेटियो । थोमस लेमारलाई फल गरेपछि रेफ्रीले भिएआरको सहायता लिदै भिक्टर लगाउरडियालाई रातो कार्ड देखाउदै मैदान बाहिर पठाएको थियो ।

एक गोलले पछि परेपनि घरेलु टोलीले ८४औं मिनेटमा खेललाई बराबरीमा ल्याउन सफल भएको थियो । पेरेजको प्रहारलाई बचाउन खोज्दा फिलिपेले आफ्नै पोस्टमा गोल गर्न पुगेका थिए ।
तर ९०औं मिनेटमा लुइस सुआरेजले जोआओ फेलिक्सको पासमा गोल गर्दै एट्लेटिकोलाई २–१ को संघर्षपुर्ण जित दिलाए ।