एजेन्सी – इंग्लिस प्रिमियर लिगमा आज राति शीर्षस्थानमा रहेको लिभरपुलले साउथह्याम्टनको भ्रमण गर्दैछ । खेल नेपाली समयअनुसार राति १ः४५ बजे हुनेछ ।

घरेलु टोली साउथह्याम्टनलाई हराउदै लिभरपुल अंक तालिकामा म्यानचेस्टर युनाइटेडलाई ३ अंकले पछि पार्ने लक्ष्यमा हुनेछ । दुवै टोलीको समान ३३ अंक रहेपनि लिभरपुल गोलअन्तरमा अघि छ ।

लिभरपुलसँग साडियो माने, मोहम्मद सलाह, रोबर्टाे फिर्मिनो, जर्जिन्हो वाइनाल्डम, जोर्डन हेन्डरसन, एलेक्स अक्सलेड चेम्वरलेन, एन्ड्रिउ रोबर्टसन, फाविन्हो, नाथानिल फिलिप्स, एलेक्सान्डर अर्नाेल्ड र गोलरक्षक एलिसन बेकर रहेको छ ।

पछिल्लो ५ खेलबाट ६ अंक गुमाएको लिभरपुलले पछिल्लो दुई खेलमा जित निकाल्न सकेको छैन । पछिल्लो दुवै खेल बराबरी खेलेको लिभरपुल साउथह्याम्टनलाई हराउदै जितको लय पक्रिने दाउमा हुनेछ ।

यता साउथह्याम्टन पनि लिभरपुललाई स्तब्ध पार्दै छैटौं स्थानमा उक्लने दाउमा हुनेछ । साउथह्याम्टन २६ अंक जोडेर नवौं स्थानमा रहेको छ । टोलीसँग चे एडाम्स, ड्यानी इंग्स, थियो वल्कोट, जेम्स वार्ड प्राउज र गोलरक्षक एलेक्स म्याकर्थीको साथ रहेको छ ।

यि दुई टोलीको पछिल्लो १९ खेलको नजितामा लिभरपुल ११ खेलमा विजयी भएको छ । ५ खेल साउथह्याम्टनले आफ्नो पक्षमा पार्दा ३ खेल बराबरीमा सकिएको छ ।