एजेन्सी – स्पेनिस महारथी रियल म्याड्रिडले सेन्टर ब्याक पाउ टोरेस अनुबन्धको लागि चासो देखाएको छ । रियलले आफ्नो अनुभवी कप्तान सर्जियो रामोसको विकल्पमा टोरेसलाई अनुबन्ध गर्न चासो देखाएको हो ।

रियलमा रामोसको सम्झौता अवधि आउदो समरसम्म मात्रै बाँकी रहँदा अझै पनि सम्झौता नविकरण भइसकेको छैन । यस्तो अवस्थामा रियलले टोरेसमा नजर लगाएको हो । स्पेनका २३ वर्षीय टोेरेसले भिल्लारियलमा उत्कृष्ट प्रदर्शन गरिरहेका छन् ।

रियल र रामोसबीच सम्झौताको लागि सकरात्मक रहेपनि सम्झौता भइसकेको छैन । रियलमा ३० वर्ष माथिको खेलाडीलाई १ वर्षको मात्रै सम्झौता थप्ने नियम रहेको छ । सोही अनुसार रियलले गत साता क्रोएसियन मिडफिल्डर लुका मोड्रिचको सम्झौता एक वर्ष थप गरेको थियो ।

रियलले रामोसको पनि सम्झौता एक वर्ष थप्न सक्नेछ । त्यसकारण रियल टोरेससँग लामो सम्झौता गर्न इच्छुक छ । भिल्लारियललले टोरेसको मुल्य ५० मिलियन युरो लगाएको छ ।

रियल र भिल्लारियलबीच सम्बन्ध राम्रो भएकाले पनि भिल्लारियलले टोरेसलाई रियलमा बेच्न सक्नेछ । भिल्लारियलले यसै समरमा रियलका जापानी मिडफिल्डर ताकेफुसा कुवोलाई लोनमा अनुबन्ध गरेको थियो । यस्तै टोरेसलाई अनुब्नध गर्न इंग्लिस क्लब आर्सनलले पनि चासो देखाएको छ ।

टोरेसले यो सिजन भिल्लारियलबाट ११ खेल खेल्दा एक गोल गरेका छन् । गत सिजन उनले ३६ खेलमा २ गोल गरेका थिए ।