५० क्याप पुरा गरेका विराज जिम्मेवारी बढेको अनुभुति गर्दैछन्

गतसाता पुणेमा भारतसंगको मैत्रिपुर्ण खेलमा ५०औं क्याप जितेका विराज समयसंगै जिम्मेवारी पनि बढ्दै गएको अनुभव रहेको बताउँछन्|

“आफु राष्ट्रिय टिममा पर्दा निकै डर लाग्थ्यो, गल्ती हुने हो कि भन्ने डरले खेल नै फरक हुन्थ्यो| तर समयसंगै निकै परिपक्व भएको अनुभव गरेको छु, अहिले त राष्ट्रिय टोलीमा आफुभन्दा पछिका खेलाडी भएकाले जिम्मेवारी झन् बढेको अनुभव गर्दैछु|” विराजले भने|

विराजले थपे, ‘राष्ट्रका लागि एक खेल खेल्न पाउनु ठुलो कुरा हो, पचास चोटि राष्ट्रको शान बोकेर मैदानमा लड्न पाउनु गौरवको विषय हो|’

५०औं क्याप पुग्दाको क्षणलाई विराजले यसरी पोखे: “सुरुमा त केहि लागेको थिएन, तर खेल पछि मैले सम्पुर्ण खेलाडी साथि लगाएत कोचहरु र म्यानेजरलाई व्यक्तिगत रुपमै धन्यवाद दिएँ| खेल सकिएपछि आफन्तजन, साथिहरु र दर्शकहरुबाट पनि धेरै बधाई पाएँ| सबैलाई पुन: एकपटक धन्यवाद दिन चाहन्छु|”

भारत विरुद्धको खेल उदृत गर्दै विराजले भने ‘सुरुमा दवावमा खेल्नुपरे पनि समय वितेसंगै क्रमश हाम्रो खेल पनि सुधारियो, खेलाडी परिवर्तन पश्चात खेल पनि परिवर्तन भयो र दवाव हराउँदै गयो|”

अहिले मनागं मर्स्याङ्दि क्लबबाट व्यवसायिक फुटबल खेल्दै गरेका विराज यसअघि थ्रि स्टार, एन्.आर.टि लगाएतका क्लबबाट खेलिसकेका छन्|