एजेन्सी – फरवार्ड इडिन्सन काभानी र मिडफिल्डर पल पोग्वाको गोल सहयोगमा शीर्षस्थानमा रहेको म्यानचेस्टर युनाइटेडले इंग्लिस प्रिमियर लिगमा फुलहममाथि पूनरागमन जित निकालेको छ ।

घरेलु टोलीसँग एक गोलले पछि परेको अवस्थामा युनाइटेडले २–१ को पूनरागमन जित निकालेको हो । फुलहमका एडेमोला लुकमनको गोल सान्त्वना बन्यो । क्राभेन कटेजमा बुधबार राति भएको खेलमा घरेलु टोलीले खेलको पाँचौ मिनेटमा नै एडेमोला लुकमनको गोलबाट अग्रता लिएको थियो । उनले एन्ड्री फ्रान्क जाम्वो एङगुइसाको पासमा गोल गरेका थिए ।

तर, फुलहमले त्यो अग्रतालाई जोगाउन सकेन । २१औं मिनेटमा इडिन्सन काभानीले गोल गर्दै खेललाई १–१ गोलको बराबरीमा ल्याए । ब्रुनो फर्नान्डेसको प्रहार रिवाउन्ड भएर फर्कदा काभनीले जाली चुमाएका थिए । ५२औं मिनेटमा लुकमन गोलबाट चुक्दा फुलहमले अग्रता लिन सकेन ।

६५औं मिनेटमा पल पोग्वाले गोल गर्दै युनाइटेडलाई २–१ को अग्रता दिलाए । ६७औं मिनेटमा ब्रुनो फर्नान्डेस चुके । ७४औं मिनेटमा रुवेन लफटस चिकले अवसर गुमाउदा फुलहम बराबरीबाट चुक्यो । ८३औं मिनेटमा पुनः लफटस नै चुके । त्यसपछि थप गोल निस्कन नसक्दा युनाइटेडले खेल २–१ ले आफ्नो पक्षमा पार्न सफल भयो ।

जितसँगै शीर्षस्थानको युनाइटेडको १९ खेलबाट ४० अंक पुगेको छ । उसले दोस्रो स्थानको म्यानचेस्टर सिटीलाई २ अंकले पछि पारेको छ । एक खेल कम खेलेको सिटीको ३८ अंक छ । पराजित फुलहम १२ अंक जोडेर १८औं स्थनमा छ ।