एजेन्सी – मर्सिसाइड क्लब लिभरपुलले जनवरी ट्रान्सफर विन्डोको अन्तिम दिन दुई डिफेन्डरलाई अनुबन्धित गरेको छ ।

लिभरपुलले बिन डेभिसलाई प्रेस्टनबाट २ मिलियन पाउन्डमा तथा ओजान काबाकलाई १.५ मिलियन पाउन्डमा जर्मन क्लब साल्केबाट आउदो समरसम्मका लागि लोनमा अनुबन्धित गरेको हो । लिभरपुलले काबाकलाई १८ मिलियनमा स्थायी रुपमा अनुबन्ध गर्न सक्ने शर्तसमेत राखेको छ ।

सिजनको शुरुवातदेखि नै मुख्य डिफेन्डर भर्जिल भान डाइकसँगै अन्य डिफेन्डर जोएल मटिप र फविन्हो पनि घाइते भएपछि लिभरपुलको डिफेन्स लाइन निकै कमजोर बन्दा जनवरी ट्रान्सफरको अन्तिम दिन दुई डिफेन्डरलाई अनुबन्ध गरेको हो ।

२० वर्षीय जर्मन सेन्टर ब्याक काबाकले साल्केमा उच्च प्रदर्शन गरेपनि साल्केको नतिजा बुन्डेसलिगामा राम्रो रहेको छैन । काबाकले एनफिल्ड क्लबबाट १९ नम्वरको जर्सी लगाउनेछन् ।

यस्तै २५ वर्षीय इंग्लिस रक्षक बिन डेभिसलाई अनुबन्धको लागि बर्नले र सेफिल्ड युनाइटेडले चासो देखाएपनि उनी लिभरपुलमा अनुबन्धित हुन सफल भए । उनले लिभरपुलमा २८ नम्वरको जर्सी लगाउनेछन् ।

साविक विजेता लिभरपुल प्रिमियरलिगमा २१ राउन्डको खेल सकिदा ४० अंक जोडेर तेस्रो स्थानमा रहेको छ । लिभरपुल शीर्षस्थानको म्यानचेस्टर सिटीसँग ४ अंकले तथा दोस्रो स्थानको युनाइटेडसँग १ अंकले पछि छ ।

प्रिमियर लिगको २१ खेलमा लिभरपुलले ११ जित, ७ बराबरी र ३ हारको सामना गरेको छ । ४३ गोल गर्दा २४ गोल खाएको छ ।