काठमाडौं (हाम्रो खेलकुद)- त्रिभुवन आर्मी फुटबल क्लबले महिला राष्ट्रिय लिगमा अर्को फराकिलो जित हासिल गरेको छ । सातदोबाटोस्थित एन्फा कम्प्लेसको मैदानमा बुधबार आर्मीले चौदण्डीगढी नगरपालिका १२-० ले हराएको छ ।

आर्मीको फराकिलो जितमा शर्मिला थापाले ५ गोल गरिन् । सब्सिच्युट सपना लामाले दुई तथा हेमा चौधरी, कप्तान अन्जली वाइवा, बिमला चौधरी, बिमला बिक र रश्मी घिसिङले समान एक–एक गोल गरिन् ।

खेलको तेस्रो मिनेटमा हेमा चौधरीले कप्तान अन्जली वाइवाको पासमा गोल गर्दै आर्मीलाई १-० को अग्रता दिलाईन् । सातौं मिनेटमा विमला चौधरीको पासमा शर्मिला थापाले गोल गर्दै आर्मीको अग्रता दोब्बर पारिन् । आठौं मिनेटमा शर्मिला थापाको पासमा कप्तान अन्जलीले गोल गर्दै आर्मीको अग्रता तेब्बर पारिन् ।

१३औं कप्तान अन्जलीको पासमा शर्मिलाले गोल गर्दै आर्मीलाई ४-० ले अघि बढाईन् । २३औं मिनेटमा बिमला चौधरीको पासमा शर्मिलाले गोल गर्दै ह्याट्रिक पूरा गर्दा आर्मी ५-० ले अघि बढाइन् । २९औं मिनेटमा रश्मि घिसिङको पासमा शर्मिलाले व्यक्तिगत चौथो गोल गरिन् ।

३०औं मिनेटमा विमलाले गोल गर्दै आर्मीलाई ७-० ले अघि बढाइन् । ३८औं मिनेटमा शर्मिला थापाले विमलाको क्विक पासमा व्यक्तिगत पाँचौ गोल गर्दै आर्मीलाई ८-० ले अघि बढाईन् । ४८औं मिनेटमा विमला बिकले गोल गर्दै आर्मीलाई ९-० ले अघि बढाइन् । ८४औं मिनेटमा रश्मिले गोल गर्दै आर्मीलाई १०-० ले अघि बढाईन् ।

८७औं मिनेटमा सपना लामाले गोल गर्दै आर्मीलाई ११-० लेअघि बढाइन् । इन्जयुरी समयको थप गरिएको पहिलो मिनेटमा सपना लामाले गोल गर्दै आर्मीलाई १२-० को फराकिलो जित दिलाईन् ।

जितसँगै दोस्रो स्थानमा रहेको आर्मीको ६ खेलबाट १३ अंक पुगेको छ। शीर्षस्थानमा रहेको एपिएफको १८ अंक छ। पराजित चौदण्डीगढीले अंकको खाता खोल्न सकेको छैन ।