दुहबी (हाम्रो खेलकुद)– वडा नं ६ सुनसरीको दुहबी जारी तेस्रो मेयर कप फुटबल प्रतियोगिताको सेमिफाइनलमा पुगेको छ । वडा नं ११ लाई बुधबार टाब्रेकरमा हराउँदै वडा नं ६ अन्तिम चारमा पुगेको थियो ।

निर्धारित ८० मिनेटको खेल २–२ को बराबरीमा टुंगिएपछि खेलको निर्णय टाइब्रेकरबाट भएको थियो । निर्धारित समयको ३९ औं मिनेटमा अरविन्द उराउ र इन्द्र कुमार उराउले इन्जुरी समयको पाँचौं मिनेटमा गोल गरेपछि वडा नं ११ ले २ गोलको अग्रता लिएको थियो । तर, जितेन्द्र चौधरीले ४१ औं र अमित चौधरीले ७१ औं मिनेटमा बराबरी गोल गर्दै वटा नं ६ लाई खेलमा फर्काएका थिए ।

टाइब्रेकरमा वडा नं ६ का लागि जितेन्द्र चौधरी, अजय गोश्वामी, मनिष विक र आशिष विकले गोल गरे । अल्लाउदिन भने गोल गर्न असफल भए । वडा नं ११ का लागि सुजनकुमार रिसिदेव र विजय उराउले गोल गरे । सुजन सरदार र सौरलाल रिसिदेव गोल गर्नबाट चुके ।

विजयी टोलीका अमित चौधरी खेलको म्यान अफ दी म्याच घोषित भए । उनले वडा नं ६ का अध्यक्ष मुना हलुवाई र वडा नं ११ का अध्यक्ष आशनारायण चौधरीले २ हजार र मेडल हस्तान्तरण गरे ।प्रतियोगितामा बिहीबार वडा नं ३ र १० बीच दोस्रो क्वार्टरफाइनल हुनेछ ।

दुहबी नगरपालिकाको आयोजना तथा दुहबीको एलेभन एरोज क्लबले संयोजन गर्ने प्रतियोगिताको विजेताले उपाधिसहित १ लाख १ हजार १ सय र दोस्रो हुने टोलीले ५१ हजार १ सय ११ रुपैयाँ प्राप्त गर्नेछ ।

त्यस्तै प्रतियोगिताका सर्वोत्कृष्ट खेलाडीले ७ हजार, सर्वाधिक गोलकर्ताले ६ हजार र विधागत उत्कृष्ट गोलकिपर, डिफेन्डर, मिडफिल्डर र फरवार्डले समान ५ हजार रुपैयाँ प्राप्त गर्नेछन् ।