एजेन्सी – बार्सिलोनाका सुपर स्टार लिओनल मेस्सीको भविष्यका विषयलाई लिएर आउने दिनमा विश्व फुटबलमा अझै बढी चर्चा हुनेछ । तर अर्जेन्टिनी स्टार भने यो सबै चर्चाबाट खुसी छैनन् ।

जारी सिजनको अन्त्य नहुँदै उनी अर्को सिजन पेरिस सेन्ट जर्मेन (पिएसजी) जाने हल्ला व्यापक भएको छ । यो वर्षको जुनमा बार्सिलोनासँगको सम्झौता सकिने छ । यो सबै चर्चाबाट मेस्सी थकित भएको बताइएको छ ।

‘पिएसजी वा अन्य क्लबको चर्चाका विषयलाई लिएर मेस्सी दिक्क भएका छन्’, मेस्सीनिकट पत्रकार अल्फ्रेडो मार्टिनेजले भनेका छन्,‘ अहिले सम्म उनले आफ्नो भविष्यको बारेमा कुनै निर्णय गरेका छैनन् । मेस्सीले यसअघिको अन्तर्वार्ताका क्रममा जारी सजनको अन्त्यसम्म कुनै निर्णय नगरिने प्रष्ट पारेका थिए । तर, पनि उनका विषयमा चल्ने चर्चा रोकिने छाट छैन ।’

बुधबार मात्र पिएसजीका एन्जेल डि मारियाले आफ्ना अन्तर्राष्ट्रिय सहकर्मी पिएसजी आउने सम्भावना रहेको बताउँदै चर्चालाई थप बल दिएका थिए । ‘उनी पिएसजी आउने सम्भावना बलियो छ,’ डि मारियाले भनेका थिए । उनको त्यो भनाई बार्सिलोनाको ड्रेसिङ रुमको चर्चाको विषय थियो ।

बार्सिलोनाका प्रशिक्षक रोनाल्ड कोम्यानले भने फ्रान्सेली टोलीले अरुलाई आदर गर्नुपर्ने बताएका छन् । बार्सिलोनाले पिएसजीबीच क्याम्प नोउमा च्याम्पियन्स लिग नकआउट चरणको पहिलो लेग हुन अब दुई साता भन्दा पनि कम समय बाँकी रहेको छ ।