एजेन्सी – सेन्टरब्याक राफयल भरानले दुई गोल गरेपछि रियल म्याड्रिडले स्पेनिस ला लिगामा हुएस्कामाथि २–१ को पूनरागमन जित हात पारेको छ ।

रियलले एक गोलले पछि परेको अवस्था उल्ट्याउदै हुएस्कामाथि उसकै मैदानमा पूनरागमन जित हात पारेको हो । जाभी गलानको गोल सान्त्वना बन्यो ।

शनिबार राति भएको खेलको पाँचौ मिनेटमा राफा मिरको प्रहारले साइड नेटिङ गर्दा घरेलु टोली हुएस्का अग्रता लिनबाट चुकेको थियो । ४७औं मिनेटमा मिकेल रिकोको प्रहार बारमा लागेर बाहिरिदा हुएस्का अग्रता लिनबाट चक्यो ।

४८औं मिनेटमा काउन्टर अट्याकमा सिन्जी ओकाजाकीको पासमा जाभी गलानले पेनाल्टी बक्सबाहिरबाट गरेको उत्कृष्ट प्रहारले जाली चुम्दा हुएस्काले खेलमा १–० को अग्रता लिन सफल भयो । ५०औं मिनेटमा राफा मिरको प्रहार क्रसबारमा लागेर फर्कदा हुएस्का अग्रता दोब्बर पार्नबाट चुक्यो ।

५४औं मिनेटमा राफयल भरानले गोल गर्दै रियललाई खेलमा फर्काए । मार्काे एसेन्सियोमाथि फल भएपछि प्राप्त फ्रिकिकमा कप्तान करिम बेन्जेमाल गरेको प्रहार क्रसबारमा लागेर फर्कदा भरानले हेडरमार्फत गोल गरेका थिए ।

६३औं मिनेटमा राफा मिरको हेडरलाई गोलरक्षक थिवाउट कोर्टुवाले एक हातले पञ्च गर्दै उत्कृष्ट बचाउ गरेपछि हुएस्काले अग्रता लिन सकेन । ६८औं मिनेटमा करिम बेन्जेमाको प्रहारलाई गोलरक्षक अल्भारो फर्नान्डेजले बचाउदै घरेलु टोलीको संकट टारे ।

७२औं मिनेटमा काउन्टर अट्याकमा राफा मिरको प्रहारले पोस्टको दिशा लिन सकेन । ७७औं मिनेटमा बेन्जेमाले क्लोज रेन्जबाट गरेको प्रहारमा गोलरक्षक फर्नान्डेज नै बाधक बने । ८१औं मिनेटमा लुका मोड्रितको क्रसमा बेन्जेमाको प्रहारलाई गोलरक्षक फर्नान्डेजले बचाए ।

८४औं मिनेटमा भरानको व्यक्तिगत दोस्रो गोलबाट रियलले खेलमा अग्रता लिन सफल भयो । टोनी क्रुसको कर्नरमा क्यासमिरोले हेडरमार्फत मिलाइदिएको पासलाई भरानले क्लोज रेन्जबाट गोल गरेका थिए ।

यो जितसँगै दोस्रो स्थानमा रहेको रियल म्याड्रिडको २१ खेलबाट ४३ अंक पुगेको छ । दुई खेल कम खेलेको शीर्षस्थानमा रहेको एट्लेटिको म्याड्रिडको ५० अंक रहेको छ । पराजित हुएस्का १६ अंक जोडेर पुछारमा रहेको छ ।