काठमाडौं (हाम्रो खेलकुद) – सहिद स्मारक ए डिभिजन लिग आयोजना अन्योलमै रहँदा बी डिभिजन लिग बिहीबार औपचारिक रुपमा सम्पन्न भएको छ । हरेक बर्ष हुनु पर्ने ए लिग यसपटक अखिल नेपाल फुटबल संघ (एन्फा) को अध्यक्ष र एक उपाध्यक्षको निर्वाचनका कारण मिति तय हुन सकेको छैन । एन्फाको निर्वाचन कात्तिक ८ गतेका लागि तय भएको छ । तर पाटन उच्च अदालतले कात्तिक ५ गते सम्मका लागि सबै निर्वाचन प्रक्रिया स्थगन गर्नुभनेपछि एन्फाको निर्वाचनसँगै ए लिग थप अन्योलमा परेको छ । कम्तिमा बी डिभिजन भने यसपटक टुंगिएको छ । भदौ ५ गते सुरु भएको लिगबाट च्यासल युथ क्लब विजेता र न्युरोड टिम (एनआरटी) उपविजेताका रुपमा ए डिभिजनमा बढुवा भइसकेका छन् ।

बिहीबार समापनमा अधिकांश व्यक्तिगत पुरस्कार भने यीनै विजेता उपविजेता टोलीले जितेका छन् । च्याम्पियन च्यासलका प्रशिक्षक चेतनारायण श्रेष्ठ स्वतः उत्कृष्ट प्रशिक्षक घोष्ति भएका छन् । उनकै खेलाडी राजाबाबु थापा उत्कृष्ट गोलकिपर र चेतन थारु उत्कृष्ट रक्षक बने । एनआरटीका सुशिल लामा उत्कृष्ट मिडफिल्डर बने । खुमलटारका कप्तान सुरज राउत उत्कृष्ट फरवार्ड छानिए । उत्कृष्ट हुनेले जनही २५ हजार रुपैयाँ प्राप्त गरे ।
बाँसबारी युवा क्लबमाथि मंगलबार ५–० को जित निकाल्दै च्यासल विजेत ाबनेको थियो ।सातदोबाटो युवा क्लबलाई २–० ले हराएको एनआरटी गोलअन्तरमा पछि पर्दै दोस्रो स्थानमा सिमित भएको थियो । २०७० यता पहिलो पटक आयोजित बी डिभिजन लिगबाट नै आठ दशक लामो इतिहास बोकेको एनआरटी बढुवा हुन सफल भएको छ । समान २८ अंक जोडेको दुई टोली मध्ये १ गोलले माथि रहेको च्यासल गोलअन्तरका आधारमा विजेता बन्यो भने र एनआरटी दोस्रो भएको थियो ।
च्यासलले ट्रफीसहित ५ लाख र उपविजेता एनआरटी युरोडले २ लाख ५० हजार रुपैयाँ प्राप्त ग¥यो । तेस्रो टोली रानीपोखरी टिम (आरसिटी) ले १ लाख ५० हजार तथा चौथो टोली सातदोबाटो युवा क्लबले ७५ हजार रुपैयाँ पायो ।

राष्ट्रिय खेलकुद परिषद् (राखेप) का सदस्य सचिव केशवकुमार विष्ट, आयोजक अखिल नेपाल फुटबल संघ (एन्फा) का कार्यवहाक अध्यक्ष नरेन्द्र श्रेष्ठ, उपाध्यक्ष कर्मा छिरिङ शेर्पालगायतले विजेता उपविजेता टोलीका खेलाडीलाई पुरस्कृत गरे ।
लिगको अन्तिम दिन बिहीबार एन्फा कम्प्लेक्समा भुवन बस्नेतको ह्याट्रिकको मद्दतमा रेलिगसेनमा परिसकेका दुई टोलीबीचको प्रतिस्पर्धामा सामाजिकले मध्यपुर युथ एसोसिएसनलाई ४–३ ले हराएको छ । पहिलो मिनेटमा गोलको खाता खोलेका भुवनले २४ औं र ६६ औं मिनेटमा गोल थप्दै ह्याट्रिक पुरा गरेका थिए । टोलीका सुरेश खत्रीले दोस्रो मिनेटमा अर्को गोल गरेका थिए । मध्यपुरका लागि सविन डंगोलले ३५ औं, यमन राजवहाकले ८६ औं र सन्तोष सिंह ठकुरीले इन्जुरी समयको दोस्रो मिनेटमा गोल गरेका थिए ।
भदौ ५ गते देखि एन्फा कम्प्लेक्स सातदोबाटो र हलचोक स्थित शसस्त्र प्रहरी बलको मैदानमा सञ्चालित लिगबाट महावीर र सामाजिक रेलिगेसनमा परेका थिए ।