एजेन्सी – स्पेनिस ला लिगामा आज राति रियल म्याड्रिडले घरेलु मैदानमा रियल सोसिडाडको आतिथ्यता गर्दैछ । खेल अल्फ्रेडो डि स्टेफानोमा नेपाली समयअनुसार राति १ः४५ बजे हुनेछ ।

घरेलु मैदानमा हुने खेलमा रियल म्याड्रिड रियल सोसिडाडलाई हराउँदै दोस्रो स्थानमा उक्लने दाउमा हुनेछ । रियल २४ खेलबाट ५२ अंक जोडेर तेस्रो स्थानमा रहेको छ । सोसिडाडलाई हराउन सके रियलले बार्सिलोनालाई पछि पार्दै दोस्रो स्थानमा उक्लनेछ । बार्सिलोना २५ खेलबाट ५३ अंक जोडेर दोस्रो स्थानमा रहेको छ ।

टोलीसँग भिनिसियस जुनियर, इस्को, मार्काे एसेन्सियो, टोनी क्रुस, क्यासमिरो, लुका मोड्रिच, फर्लान्ड मेन्डी, नाचो फर्नान्डेज, राफयल भरान, लुकास भाज्क्वेज र थिवाउट कोर्टुवाको साथ रहेको छ । चोटका कारण कप्तान सर्जियो रामोस, रोड्रिगो, इडर मिलिसाओ, इडेन हाजार्ड र ड्यानी कार्भाहल टोलीमा हुनेछैन । फरवार्ड करिम बेन्जेमाले खेल्ने सम्भावना न्युन रहेको छ ।

यता, रियल सोसिडाड पनि रियललाई स्तब्ध पार्दै अंक तालिका सुधार गर्ने लक्ष्यमा हुनेछ । सोसिडाड २४ खेलबाट ४१ अंक जोडेर पाँचौ स्थानमा रहेको छ । टोलीसँग एलेक्सान्डर इसाक, मिकेल ओयरजवाल, डेभिड सिल्भा, क्रिस्टियन पोर्टु, जोन गुरिडी, नाचो मोनरियल र गोलरक्षक एलेक्स रेमिरोको साथ रहेको छ ।

यि दुई टोलीको पछिल्लो २२ खेलको नतिजामा रियलले १६ खेल आफ्नो पक्षमा पारेको छ । ४ खेल सोसिडाडले जित्दा २ खेल बराबरीमा सकिएको छ । पछिल्लोपटक यि दुई टोलीले गोलरहित बराबरी खेलेका थिए ।