हाम्रो खेलकुद – भारतिय स्पिनर रविचन्द्रन अश्विनले ६ विकेट लिएपछि तेश्रो टेष्टको तेश्रो दिन न्युजिल्याण्ड पहिलो इनिङ्ग्समा अलआउट भएको छ।
भारतले पहिलो पारीमा खडा गरेको ५५७ रनको विशाल योगफललाई पछ्याउँदै गरेको न्युजिल्याण्ड २९९ रनमै सिमित भयो। ओपनरद्वय मार्टिन गप्टिल (७२) टम लेथम(५३)ले पहिलो विकेटका लागि ११८ रनको बलियो साझेदारी गरेका थिए। मध्यक्रममा जेमी निशमले ७१ रन बनाउनबाहेक अन्य कसैले सम्हालिएको पारी नखेलेपछि न्युजिल्याण्डले फलोअन स्कोर पनि पार गर्न सकेन।
भारतका लागि रविचन्द्रन अश्विनले छ विकेट लिएका थिए भने दुई रन आउट पनि पारेका थिए। बाँकि दुई विकेट रविन्द्र जडेजाको नाममा रह्यो।
भारतले आफ्नो दोश्रो पारीको पनि सुरुवात गरिसकेको छ र १८/०को स्थितिमा दिनको खेल समाप्त भएको छ। भारतका गौतम गम्भीर भने रन लिने प्रयासमा पाखुरामा चोट लागेपछि रिटायर्ड हर्ट भएका छन्।
