गणेश दर्पण अधिकारी, हेटौंडा

विभागीय टोली त्रिभुवन आर्मी क्लब स्थानीय तह शहीद स्मृति गोल्डकप फुटबल प्रतियोगिताको फाइनलमा प्रवेश गरेको छ । बिहीबार भएको दोस्रो सेमिफाइनलमा क्यामरुनको अफ्रिकन रुट्स एशोसिएसनलाई १–० गोल अन्तरले हराउँदै आर्मीले घरेलु टिमसंगको उपाधि भिडन्त पक्का गरेको हो ।

निकै प्रतिस्पर्धात्मक खेलमा आर्मीले ६८ औं मिनेटमा गरेको गोल नै निर्णायक बन्यो । कप्तान टेकबहादुर बुढाथोकीको क्रसलाई सदुपयोग गर्दै आशिष शाक्यले निर्णायक गोल गरे। बाँकी समयमा दुवै टिमको तर्फबाट थप गोल हुन नसक्दा आर्मीले १–० को जित दर्ता गर्दै उपाधि भिडन्त पक्का गरेको हो ।

खेलमा आर्मीका कप्तान बुढाथोकी म्यान अफ द म्याच भए । उनले नगद १० हजार रुपैयाँ र प्रमाणपत्र प्राप्त गरे । क्यामरुनका प्रशिक्षक इजाले बोलिसले आर्मीले निकै राम्रो खेल प्रस्तुत गरेको प्रतिक्रिया दिँदै सोचे अनुसारको खेल्न नसक्दा आफ्नो टिमले हार व्यहोरेको प्रतिक्रिया दिए ।

आर्मीका प्रशिक्षक नविन न्यौपानेले खेलाडीको कडा मेहनत नै जितको प्रमुख कारण भएको प्रतिक्रिया दिए । ‘क्यामरुनका खेलाडी हाम्रो भन्दा राम्रो ‘लेवल’ का हुन् । काउन्टर अट्याकमा गोल गर्ने रणनीति अनुसार खेलेका थियौं । पाएको एउटै मौकालाई हामीले सदुपयोग गर्यौं’, उनले भने, ‘यही टिम फाइनल जित्ने लक्ष्यका साथ मैदान उत्रिनेछ ।’

यसअघि बुधबार भएको खेलबाट ए डिभिजन लिग विजेता मछिन्द्र क्लबलाई हराउँदै डिफेण्डिङ च्याम्पियन मकवानपुर ११ ले फाइनलमा स्थान सुरक्षित गरिसकेको छ । मकवानपुर जिल्ला फुटबल संघको आयोजनामा हेटौंडामा फागुन २७ गतेबाट सञ्चालन भएको प्रतियोगितामा १० टिमको सहभागिता रहेको थियो ।

प्रतियोगिताको विजेताले १० लाख र उपविजेताले ५ लाख रुपैयाँ नगद प्राप्त गर्नेछ भने सर्वोत्कृष्ट खेलाडीले बुलेट बाइक प्राप्त गर्नेछन् । यस्तै विधागत उत्कृष्ट खेलाडी र प्रशिक्षकले जनही २५ हजार रुपैयाँसहित ट्रफी र प्रमाणपत्र प्राप्त गर्नेछ । प्रतियोगितालाई मकवानपुरका १० वटै स्थानीय तहहरुले आर्थिक सहयोग गरेका छन् ।